ەرەكشە قاجەتتىلىكتەرى بار دارىندى بالالاردى قولداۋعا ارنالعان جاڭا جوبا باستالدى

بۇل شارا قازاقستاننىڭ بارلىق وڭىرلەرىنەن ەرەكشە ءبىلىم بەرۋ قاجەتتىلىكتەرى بار دارىندى بالالارعا قولداۋ كورسەتۋدى، شىعارماشىلىق باعىتتا دامىتۋدى ماقسات ەتەدى. جوبا بالالار جىلى اياسىندا جۇزەگە اسىپ وتىر.

گالا-كونسەرتكە قاتىسقان بالالاردى مادەنيەت جانە سپورت ءمينيسترى داۋرەن ابايەۆ قۇتتىقتاپ، ينكليۋزيۆتى ءبىلىم بەرۋ مەن قوعامدى دامىتۋدا مۇنداي جوبانىڭ ماڭىزى زور ەكەنىن اتاپ ءوتتى. ەلىمىزدەگى ەرەكشە بالالاردىڭ ونەرىن ۇشتاۋعا باعىتتالعان فەستيۆال رەسپۋبليكامىزدىڭ ءار ايماعىنداعى دارىندى جاستاردىڭ باسىن قوسادى.

«ونەر - ادامنىڭ جانىن عانا ەمدەمەيدى، ونىڭ تانىنە دە تىرەك بولادى. بالالاردىڭ تالانتىن اشۋدا مۇنداي الاڭدار قاشاندا قاجەت. سوندىقتان وسى جوبانا جۇزەگە اسىرۋعا اتسالىسقان ازاماتتاردىڭ بارلىعىنا العىس ايتامىن. سىزدەر بالالاردى باقىتتى، ال قوعامدى مەيىرىمدى ەتۋگە ۇلەس قوسىپ وتىرسىزدار»، - دەدى داۋرەن ابايەۆ.

گالا-كونسەرتتە روزا رىمبايەۆا، ايجان نۇرماعامبەتوۆا، قۇرماش ماحان، سالتانات مەڭدىعاليەۆا، الىبەك الماديەۆ، رۋحيا بايدۋكەنوۆا، ديدار ابدۋحالىق، گۇلدانا اكيموۆا (فلەيتا) سىندى تانىمال ارتىستەر، «استانا سازى» مەملەكەتتىك فولكلورلىق ءانسامبلى، «مەلومەن» توبى، Turan فولكلورلىق- ەتنوگرافيالىق ءانسامبلى، Forte Trio جانە SazSoul شىعارماشىلىق ۇجىمدارى بالالارمەن بىرگە ونەر كورسەتتى. مۇنى فەستيۆالدىڭ ەرەكشەلىكتەرىنىڭ ءبىرى رەتىندە اتاپ وتسەك بولادى.