اۆتوۇيدە تۇرىپ جاتقان جاس وتباسى كولىگىمەن ەل ارالاعىسى كەلەدى
تۇركىستان وبلىسىنىڭ تۋماسى ەرلى-زايىپتى نۇرجىگىت بالتاباي مەن توميريس ءابدىقادىر سوڭعى ءبىر اي شاماسىندا اۆتو ءۇيدى پانالاپ وتىر.
«جالپى اۆتوۇيدە تۇرۋ، اۆتوۇيمەن ساياحات جاساۋ تاجىريبەسى شەت ەلدەردە جاقسى دامىعان. ءبىز دە سونى كورىپ قىزىعىپ، اۆتوۇيدە تۇرامىز دەپ شەشتىك. تۇرىپ جاتقانىمىزعا ءبىر اي بولىپ قالدى. اۆتو ءۇيدى حابارلاندىرۋ ارقىلى تاۋىپ، قاراعاندى قالاسىنان الىپ كەلدىك. ازىرگە وسىندا تۇرامىز، ودان ءارى ۋاقىت كورسەتەدى. ءبىز قازاقستاننىڭ ءبىراز وڭىرىندە بولماعانبىز. سوندىقتان الداعى ۋاقىتتا ەل ارالاپ، ساياحات جاساۋ ويىمىز بار. ەلىمىزدىڭ ادەمى جەرلەرىن ءوز كوزىمىزبەن كورگىمىز كەلەدى. قازىردىڭ وزىندە شىمكەنتتىڭ ماڭىنداعى ەلدىمەكەندەردى ارالاپ ءجۇرمىز»، - دەدى نۇرجىگىت بالتاباي.
وتاعاسى نۇرجىگىت اۆتوەلەكتريك بولىپ جۇمىس ىستەيدى، ال زايىبى توميريس قولونەرمەن اينالىسادى.
«ءبىزدىڭ اۆتوۇيدە تۇرۋ يدەيامىزدى جاقىندارىمىز قولدادى. ەشقانداي قارسىلىق بىلدىرگەن جوق. ونىڭ ۇستىنە بۇل جەردە تۇرمىسقا قاجەتتى زاتتاردىڭ ءبارى بار، جاعداي جاسالعان. ءاۆتوۇيدىڭ ۇزىندىعى - 5 مەتر، بيىكتىگى - 3 مەتردى قۇرايدى. ءبىز ءۇشىن ىڭعايلى. باستىسى شاعىن، جيناعاندا كوپ ۋاقىت المايدى. ءبىراق تەز جىلىپ، تەز سۋيدى. ەندى عانا تۇرىپ جاتقاندىقتان ازىرگە اسا قيىندىق، كەدەرگى بولمادى. وتكەندە جاڭبىر جاۋعاندا توبەسىنەن سۋ اقتى، ونى جوندەدىك. اۆتونومدى جىلۋ جۇيەسىمەن جۇمىس ىستەيدى. ياعني سولياركا قولدانامىز»، - دەيدى ەرلى-زايىپتىلار.
