اياعى جانسىزدانعان ازاماتقا ەلوردا دارىگەرلەرى ەرەكشە وتا جاسادى

الەۋمەتتىك مەديتسينالىق ساقتاندىرۋ قورىنىڭ مالىمەتىنشە، پاتسيەنتكە ءمامس جۇيەسى اياسىندا ەم جۇرگىزىلۋدە.

قوستاناي وبلىسى رۋدنىي قالاسىنىڭ تۇرعىنى 2022 -جىلدىڭ ماۋسىم ايىندا جۇمىس ۋاقىتىندا جۇك كولىگىنەن سەكىرىپ، العان جاراقاتىنىڭ سالدارىنان اياعى جانسىزدانىپ قالعان. سول مەزەتتە جەدەل جاردەم شاقىرىلىپ، ول جەرگىلىكتى كوپسالالى اۋرۋحاناعا جەتكىزىلگەن.

5-اي ۋاقىت ارالىعىندا اۋرۋحانادا بولعان ناۋقاستىڭ اياعىن ساقتاپ قالۋ ءۇشىن وعان يليزاروۆ اپپاراتى قويىلدى. سونىمەن قاتار بىرنەشە اۋىر وتا جاسالدى. پاتسيەنتتى ءارى قاراي ەمدەۋ ماقساتىمەن رۋدنىي قالاسىنىڭ كوپسالالى اۋرۋحانا دارىگەرلەرى تەلەمەديتسينا ارقىلى اكادەميك ن. ج. باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنىڭ ماماندارىمەن بايلانىستى. پاتسيەنت جايلى تولىق اقپارات ناقتىلانعان سوڭ، ناۋقاستى استانا قالاسىنا جەتكىزۋ ۇسىنىلدى.

«قازان ايىنىڭ سوڭىندا پاتسيەنتتى ءبىزدىڭ ورتالىققا جەتكىزگەننەن كەيىن، بولىمشە دارىگەرلەرى ونى تولىق قاراپ، جاعدايىن ويلاستى. كونسيليۋم بارىسىندا الدىمەن تەرى ترانسپلانتاتسياسىن جاسايمىز، سودان سوڭ ناۋقاسقا وسىعان دەيىن ورناتقان يليزاروۆ اپپاراتىن شەشىپ، وڭ اياعىنا باسقا جولمەن بەكىتۋ تۋرالى شەشىم قابىلداندى»، - دەيدى اكادەميك ورتالىقتىڭ №4-تراۆماتولوگيا بولىمشەسىنىڭ دارىگەرى ءاليا اتاپيليەۆا.