لوندوندا قازاقستاننىڭ تۋريستىك الەۋەتى تانىستىرىلدى

تۇرالاپ قالعان تۋريزم سالاسى پاندەميادان كەيىن قايتا قارقىن الا باستادى. شەكتەۋلەر جەڭىلدەگەلى ساياحاتقا دەگەن قىزىعۋشىلىق ارتتى.

حالىقارالىق تۋريزم كورمەسى سول سۇرانىستى قاناعاتتاندىرۋ ءۇشىن دۇنيەجۇزى بويىنشا 180 ەلدەن 5000-نان استام قاتىسۋشى جانە 150 مىڭعا جۋىق كورەرمەن جينادى.

«كورمە، روۋد- شوۋ سياقتى شارالاردان كەيىن ەلىمىزگە 200-500 تۋريستكە دەيىن كەلەدى. ءبىراق ودان بولەك يميدجىمىز ارتادى. قازاقستان مۇنداي شارالارعا قاتىسپاسا، باسقا مەملەكەتتەر ءبىز تۋرالى بىلمەيدى. ەكىنشىدەن، تۋريزم ساۋدا جانە ينۆەستيتسيانىڭ دامۋىنا اسەرە ەتەدى. ويتكەنى ول ۇعىمدار قاتار جۇرەدى»، دەيدى «Kazakh Tourism» ۇ ق» ا ق باسقارما ءتوراعاسى تالعات امانبايەۆ.

كوپتەگەن ەلدەر ءۇشىن تۋريزم - يندۋستريا. ول كىرىس اكەلىپ، حالىقتىڭ ءال- اۋقاتىنىڭ جاقسارۋىنا كومەكتەسەدى.

قازاقستاندا دا تۋريزم ىلگەرى دامىپ كەلە جاتقان سالالاردىڭ ءبىرى جانە ونىڭ الەمدىك نارىقتا ويىپ تۇرىپ ورىن الۋعا مۇمكىندىگى جەتكىلىكتى.

«قازاقستاندا تۋريزم تۇرعىسىنان شەتەلدىك قوناقتارعا كورسەتەتىن كوپ دۇنيە بار ەكەندىگىنە سەنىمدىمىن. بۇعان قوسا بۇل سالا ءبىزدىڭ ەكونوميكامىز ءۇشىن وتە قاجەت يندۋسترياعا اينالا الادى. سوندىقتان مەنىڭ ويىمشا، قازاقستاننىڭ وسىنداي حالىقارالىق كورمەلەرگە بەلسەندى قاتىسۋى وتە ماڭىزدى»، دەيدى قازاقستاننىڭ ۇلىبريتانياداعى ەلشىسى ماعجان ءىلياسوۆ.

باسقالاردى بىلاي قويعاندا بريتانيالىق ساياحاتشىلاردىڭ ەلىمىزگە دەگەن قىزىعۋشىلىعى جوعارى.

ولار ۇلى جىبەك جولى بويىندا ورنالاسقان كونە قالالارىمىز بەن تىلسىم تابيعاتىمىزعا ىنتىزار. ونىڭ ۇستىنە اعىلشىنداردان 30 كۇنگە دەيىن ۆيزا تالاپ ەتىلمەيدى.

پاندەمياعا دەيىن 2019 -جىلى 23 مىڭعا جۋىق بريتانيالىق قازاقستانعا اتباسىن بۇرعان ەكەن.

«بيىل كوروناۆيرۋستان كەيىن ءبىرىنشى بولىپ، ۇلى بريتانيادان تۋريستەر كەلدى. ولار، مەن ويلايمىن، ەشتەڭەدەن قورىقپايدى. 12-17 كۇنگە كەلىپ توقتادى. اعىلشىندار ەلىمىز تۋرالى الدىن الا وقىپ، دايىندالىپ كەلەدى. ءبىز ولارعا ءارتۇرلى قىزىقتارىمىزدى ۇسىنامىز. شاتقالدار، ساياباقتار، جىبەك جولى مارشرۋتتارىن كورسەتەمىز»، دەيدى «تۇران- ازيا» تۋريستىك كومپانياسىنىڭ ديرەكتورى گۇلعايشا قاسەنوۆا.

«وكىلدەرىڭىزبەن وتىرىپ اڭگىمەلەستىم. ەكراندا كورسەتىلىپ جاتقان ۆيدەونى كورىپ، تاڭ- تاماشا بولدىم. مەنىڭشە، سىزدەردە ءداستۇر، مادەنيەت، ساۋلەت ونەرى جانە تابيعات كەرەمەت ۇيلەسىم تاپقان. مەن قازاقستاندا ەشقاشان بولمادىم، ءبىراق 2023 -جىلى بارۋدى جوسپارلاپ وتىرمىن»، دەيدى ساياحاتشى توم پەيدج.

ەۋروپالىق تۋريست قازاقستانعا تابان تىرەگەندە ورتاشا العاندا قالتاسىنان 1500 دوللار شىعارادى ەكەن.

ماسەلەن، 100 تۋريست كەلسە، وسىنداي ءىس- شارالارعا جۇمسالعان شىعىن سالىقتىڭ ەسەبىنەن تولىق جابىلىپ، جەرگىلىكتى بيۋدجەتتىڭ دە، بيزنەستىڭ دە كىرىسى ەسەلەنە تۇسەدى دەيدى ماماندار.

اۆتور