قاۋىپ ءتونىپ تۇرعانىن ەسكەرتىپ، تۇسىڭىزگە كىرەتىن ءۇش بەلگى

الايدا كەيبىر ادامدار كورگەن تۇسىنە ءمان بەرمەي دە جاتادى. دەگەنمەن ءتۇس - ءبىر بەلگى بولۋى دا مۇمكىن. بۇعان دەيىن قايتىس بولعان ادام تۇسىڭە كىرسە نە بولاتىنىن تۇسىندىرگەن بولاتىنبىز.

ال جابايى جانۋار نە ءۇي جانۋارلارىن كورۋ نە ءبىلدىرۋى مۇمكىن؟

Massaget.kz ءتىلشىسى انىقتاپ كوردى.

جىلقى كورسەڭىز...

تۇسىڭىزدە جىلقى كورۋ جاقسىلىقتىڭ دا، سۋىت حاباردىڭ دا نىشانى بولۋى مۇمكىن. مىسالى اقبوز اتتان قۇلاساڭىز، بۇل جاقسىلىق بەلگىسى ەمەس. ابىروي-بەدەلىڭىز ءتۇسىپ، قاۋىپ-قاتەرگە كەز بولۋىڭىز مۇمكىن.

ەگەر ات ءمىنىپ، ەل ارالاپ جۇرسەڭىز، ارماندارىڭىز بەن ماقساتتارىڭىز ورىندالادى. بويداق بولساڭىز شاڭىراق كوتەرۋىڭىز مۇمكىن. ۇيىقتاپ جاتقاندا ات كورۋدەگى تاعى ءبىر جاقسى بەلگى - جىلقىنى وزەندە نە ارىقتا سۋارۋ. دەمەك داۋلەتىڭىز ارتىپ، بايلىعىڭىز تاسيدى. مۇنداي ءتۇس كورگەن كۇننەن ءبىر اپتاعا دەيىن بىرەۋلەرمەن جانجالداسىپ قالۋدان ساق بولىڭىز.

ال ەگەر قارا ات كورسەڭىز جانە ول ءسىزدى تەبەتىن بولسا، نە ءمىنىپ جۇرگەندە ۇرا-جىراعا جىعىپ كەتسە - بۇل جاقسىلىق نىشانى ەمەس. الدا قاۋىپ-قاتەر بارىن ەسكەرتەدى. جارالانعان نە ءولى جىلقى كورۋ - قايعىلى حاباردىڭ نىشانى.

جالپى تۇسىڭىزدە كورگەن جانۋاردىڭ ءتۇسى ارقىلى ونىڭ قانداي ماعىنا بىلدىرەتىنىن انىقتاۋعا بولادى. مىسالى:

قارا ءتۇستى جانۋار - قايعى، پروبلەما الىپ كەلەدى.

اق - قۋانىش، ساتتىلىك.

قارا جانە اق - تۇراقسىزدىق پەن ادەتتەن تىس جاعدايلاردىڭ بەلگىسى.

قىزىل جانۋار ماحابباتتىڭ بەلگىسى. ول كوبىنە بىرەۋ سىزگە عاشىق بولىپ جۇرگەنىن بىلدىرەدى.

ال ءتۇسى ەرەكشە نە تۇسىنىكسىز جانۋاردى كورسەڭىز - ومىرىڭىزدە تۇسىنىكسىز جايتتار بولۋى مۇمكىن.

قاسقىر دا ءبىر بەلگى

تۇسىڭىزدە قاسقىر كورۋ دۇشپانىڭىزدىڭ دا، دوسىڭىزدىڭ دا ارەكەتىنە قاتىستى بەلگى بولۋى مۇمكىن. ول قاسقىر تۇسىڭىزدە نە ىستەپ جۇرگەنىنە بايلانىستى. مىسالى قاسقىر ۇلىپ جۇرسە ءسىزدىڭ باقتالاستارىڭىز بار دەگەن ءسوز. ال قاسقىرلاردىڭ اراسىندا جۇرسەڭىز ناعىز كۇرەسەتىن قيىندىقتارعا تاپ بولاسىز. ءبىراق ول قيىندىقتى ەڭسەرەسىز. مۇنداي ءتۇستى نازاردان تىس قالدىرماۋ كەرەك. تەك ادامدارمەن ارالاسقاندا تىم اشىلىپ كەتپەڭىز.

جەلىدە قاسقىردى تۇستە كورۋگە ايگىلى ۆانگا دا بولجام جاساعان ەكەن. بولجام بويىنشا، تۇسىڭدە جالعىز جۇرگەن جىرتقىشتى كورۋ - ءسىزدىڭ ورتاڭىزدا سىزگە ارامدىق ويلاپ جۇرگەن ادام بار دەگەن ءسوز ەكەن.

ال تۇرمىسقا شىعايىن دەپ جاتقان قىز ءۇيىر قاسقىردى كورسە، دەمەك ول باقىتتى بولادى جانە ونىڭ وتباسىلىق ءومىرى بەرىك بولادى. تۇسىڭىزدە ءوزىڭىز قاسقىر بولىپ جۇرسەڭىز - بۇل جاقسىلىقتىڭ نىشانى. ياعني قانداي دا ءبىر جاڭا نارسە باستاساڭىز، ول ءساتتى بولادى. تۇسىڭىزدەگى قاسقىردىڭ قۇيرىعى ۇزىن بولۋى - وڭىڭىزدە دەنساۋلىعىڭىز جاقسى بولاتىنىن جانە ۇزاق ءومىر سۇرەتىڭىزدى بىلدىرەدى.

قاسقىردى ءولتىرۋ - ابىروي بەدەلىڭىزدى قايتاراسىز دەگەن ءسوز. قاسقىرمەن «كۇرەس» بارىسىندا ونى جەڭسەڭىز قىزمەتىڭىز ءوسۋى مۇمكىن.

جىلاندى دا ءجيى كورەتىندەر بار

ەڭ الدىمەن جىلاندى تۇسىڭىزدە كورۋ قانداي جاعدايدا قاۋىپ-قاتەردىڭ بەلگىسى بولۋى مۇمكىن ەكەنىن انىقتاپ كورەيىك. بىرىنشىدەن، تۇسىڭىزدە جىلان جولىڭىزدى كەسىپ وتسە، جاۋىڭىز ارتىپ، جولىڭىز بولماۋى مۇمكىن. سونىمەن قاتار، جىلان تۇسىڭىزدە شاعىپ السا نە ورالىپ قالسا دۇشپانداردىڭ تورىنا ءتۇسۋىڭىز مۇمكىن. مۇنداي جاعدايدا ءتۇسىڭىزدى كەز كەلگەن ادامعا ايتا بەرمەي، اۋزى دۋالى ادام تاۋىپ، جورىتىڭىز. ارتىنشا ول ادامعا ساداقا بەرگەنىڭىز ءجون.

تۇسىڭىزدە جىلاننىڭ بوساعادا نەمەسە شاڭىراقتا تۇرۋى دا قاۋىپتىڭ بەلگىسى. بۇل جاعدايدا ءتۇستى يمانعا جورىتۋ قاجەت. ساداقا رەتىندە قارا ءتۇستى نارسە بەرىپ، قۇداي تاماق بەرىپ جىبەرگەنىڭىز دە دۇرىس.

ال تۇسىڭىزدە جىلاندى ءولتىرۋىڭىز - جاقسىلىقتىڭ نىشانى. دەمەك وڭىڭىزدە ابىروي-بەدەلىڭىز ارتىپ، جۇلدىزىڭىز جانادى. مۇنداي ءتۇستى اناڭىزعا جورىتقانىڭىز دۇرىس. سونىمەن قاتار، تۇسىڭىزدە جىلان سىزگە ەش زيان كەلتىرمەگەنى دە جاقسىلىقتىڭ بەلگىسى. بۇل جاعدايدا اق ءتۇستى نارسەنى ساداقا رەتىندە بەرگەن دۇرىس.