الماتىلىق ايەل ءوزىن قاتىگەزدىكپەن پىشاقتاعان جۇبايىنىڭ ۇستىنەن شاعىمداندى

«بۇگىن مەن بارلىق قورقىنىشىمدى جەڭىپ، 2022 -جىلدىڭ 21-مامىرىندا ساعات 5:30 دا الماتىدا، ءبىزدىڭ ۇيدە قىزىم ەكەۋمىزدىڭ باسىمىزدان كەشكەن سۇمدىق وقيعانى ايتايىن دەپ شەشتىم. قىزىم ەكەۋمىز ءبىر بولمەدە، ءبىر توسەكتە، جۇبايىم زالدا ۇيىقتاپ جاتقان. جۇبايىم مەنى پىشاقتاعالى جاتقان ساتىندە مەن ويانىپ كەتتىم. ول ءبىر قولىمەن مەنىڭ اۋزىمدى باسىپ، ەكىنشى قولىمەن كەسكىلەپ، موينىما پىشاق سۇعىپ جاتتى. مەن قارسىلىق تانىتىپ، ايقايلاۋعا تىرىستىم، اۋزىمنان قولىن الىپ تاستاۋعا تىرىسىپ، جۇلقىندىم. ءبىز ەدەنگە قۇلادىق، مەن اينالامداعى بارلىق نارسەنى ۇستاي باستادىم، ءبىراق، ول مەنى جىبەرمەي، اۋزىمدى مىقتاپ ۇستاپ، پىشاقتى ماعان سۇعا بەردى»، - دەپ جازدى يرينا.

ايەل بولعان وقيعانى كىسى ولتىرۋگە ۇمتىلۋ دەپ سانايدى، ءبىراق، ءىس دەنساۋلىققا اۋىر زيان كەلتىرۋ بابى بويىنشا سارالانعان. يرينا جۇبايى تاعى زيانىن تيگىزە ما دەپ قورقادى.

الماتى قالالىق پوليتسيا دەپارتامەنتى وقيعانى«دەنساۋلىققا قاساقانا اۋىر زيان كەلتىرۋ» بابى بويىنشا تەرگەلىپ جاتقانىن حابارلادى.

«بۇل فاكتىنى بوستاندىق اۋدانىنىڭ پوليتسيا باسقارماسى جانىنداعى پوليتسيا ءبولىمىنىڭ قىزمەتكەرلەرى تەكسەردى. كۇدىكتى، 1993 -جىلى تۋعان ۆ. ەسىمدى ازامات دەرەۋ ۇستالىپ، ۋاقىتشا ۇستاۋ يزولياتورىنا قامالدى. ونىڭ ارەكەتتەرى قىلمىستىق كودەكستىڭ 106-بابى بويىنشا سارالاندى. 2022 -جىلعى 19-تامىزدا قىلمىستىق ءىس ماتەريالدارى ايىپتاۋ اكتىسىمەن الماتى قالاسىنىڭ بوستاندىق اۋدانىنىڭ سوتىنا بەرىلدى»، - دەپ حابارلادى الماتى قالالىق پوليتسيا دەپارتامەنتىنىڭ باسپا ءسوز قىزمەتى.

اۆتور

دۋمان ارعىنگەلدى