بالالار ءۇشىن اۆيابيلەت قۇنىن سۋبسيديالاۋ ءتارتىبى وزگەرمەك

تولىقتىرۋ ەنگىزىلگەلى وتىرعان قۇجاتتى مادەنيەت جانە سپورت مينيسترلىگى اشىق تالقىعا شىعاردى، دەپ حابارلايدى قازاقپارات ءتىلشىسى.

قۇجات «مارشرۋت تۇبىرتەگى»، «ەلەكتروندىق بيلەت» سياقتى تەرميندەرمەن تولىقتىرىلعان.

«قازاقستان رەسپۋبليكاسىنىڭ اۋماعىندا كامەلەتكە تولماعان جولاۋشىلاردى اۋەمەن تاسىمالداۋ كەزىندە تۋريستىك ونىمگە قوسىلعان بيلەت قۇنىن سۋبسيديالاۋعا ارنالعان ءوتىنىمدى ءتيىستى كۇنتىزبەلىك جىلدىڭ ءبىرىنشى جۇمىس كۇنىنەن باستاپ 1- جەلتوقسانىنا دەيىن قاعاز نەمەسە ەلەكتروندىق نىساندا پوشتا نە قولما-قول قۇجاتتار ارقىلى جولدايدى»، - دەپ كورسەتىلگەن بۇيرىق جوباسىندا.

ءوتىنىم بەرۋشى قازاقستان رەسپۋبليكاسىنىڭ ازاماتى نەمەسە قازاقستان رەسپۋبليكاسىندا تۇراقتى تۇرۋعا رۇقساتى بار ازاماتتىعى جوق تۇلعا بولىپ تابىلاتىن كامەلەتكە تولماعان جولاۋشىعا بيلەتتىڭ نەمەسە ەلەكتروندىق بيلەتتىڭ، مارشرۋتتىق تۇبىرتەكتىڭ جانە جولاۋشىلار كۋپونىنىڭ نەمەسە اۆياكومپانيا بيلەتىن پايدالانۋ تۋرالى راستاۋ- انىقتاماسىنىڭ كوشىرمەلەرىن ۇسىنۋى ءتيىس.

جاڭا وزگەرىستەردىڭ ءبىرى ءوتىنىشتى قاراۋ مەرزىمىنە قاتىستى. اتاپ ايتقاندا، بۇرىن بيلەت قۇنىن سۋبسيديالاۋ ءوتىنىشى 10 كۇندە قارالسا، ەندى ول 7 جۇمىس كۇنىنە دەيىن قىسقارماق.

سونداي- اق سۋبسيديا بەرەتىن ۇيىم قاراجاتتى تۋريستىك وپەراتوردىڭ ەسەپشوتىنا 25 كۇندە اۋدارماق. بۇعان دەيىنگى ەرەجەدە ول 45 كۇن بولاتىن.

«شەشىمدەر قابىلداۋدىڭ تيىمدىلىگى مەن جەدەلدىگىن ارتتىرۋ ماقساتىندا تۋروپەراتورلارعا سۋبسيديا تولەۋ شاراسىن پراكتيكالىق ىسكە اسىرۋ نەگىزىندە 45 جۇمىس كۇنىنەن 25 جۇمىس كۇنىنە دەيىن قىسقارتۋ ۇسىنىلادى»، - دەلىنگەن مينسترلىك بۇيرىعىندا.

سۋبسيديا رەتىندە بەرىلەتىن قارجى ەكىنشى دەڭگەيدەگى بانكتەردىڭ بىرىندە اشىلعان ىشكى تۋريزم سالاسىنداعى تۋروپەراتوردىڭ ەسەپ شوتىنا اۋدارىلادى.

بۇيرىقتى اشىق تالقىلاۋ 17- قاراشاعا دەيىن جالعاسادى.