شىمكەنتتە تۇتىنۋشىلارىن تالاستىرعان دۇكەن يەسى جاۋاپقا تارتىلاتىن بولدى

شىمكەنتتەگى سپورتتىق كيىم ساتاتىن دۇكەن يەسى ۇيىمداستىرعان اكسيانىڭ سوڭى شۋعا اينالدى. ارزان كيىم العىسى كەلگەن كوپشىلىك جارنامانى ەستىگەن بويدا دۇكەنگە قاراي لاپ بەرگەن. ناتيجەسىندە دۇكەنگە كىرۋگە تالاسقان تۇتىنۋشىلار ءبىر ءبىرىنىڭ ومىرىنە قاۋىپ ءتوندىردى.

ال، بۇگىن دۇكەن يەسى كوپشىلىكتەن كەشىرىم سۇرادى.

«5-قاراشا كۇنى بولعان اكسيانى الەۋمەتتىك جەلىگە تاراتۋىمنىڭ سەبەبىنەن ادامدار كوپ جينالىپ، تۇسىنبەۋشىلىكتەر بولدى. سونىڭ سالدارىنان تۇرعىلىقتى ۋچاسكەلىك ينسپەكتوردى شاقىرىپ، جاعدايدى رەتتەستىردىك. قۇزىرلى ورگاندارعا حابار بەرمەۋىمنىڭ سەبەبىنەن وسىنداي جاعداي بولدى. سىزدەردەن كەشىرىم سۇرايمىن. ەندى وسىنداي اكسيا ۇيىمداستىرىپ وتكىزەتىن بولسام، مىندەتتى تۇردە قۇزىرلى ورگاندارعا حابار بەرەمىن»، - دەيدى ول.

ايتا كەتەيىك، بۇگىن اتالعان جاعداي بويىنشا تۇسىنىك بەرگەن شىمكەنت قالالىق پوليتسيا دەپارتامەنتىندەگىلەر دۇكەن يەسىنىڭ ق ر ا ق ب ت ك-نىڭ 488-1-بابى بويىنشا اكىمشىلىك جاۋاپكەرشىلىككە تارتىلاتىنىن حابارلادى.