ەرلان قارين پرەزيدەنت بۇگىن جاريا تۇردە قول قويعان زاڭدارعا قاتىستى پىكىر ءبىلدىردى
«پرەزيدەنت بيىل 16-ناۋرىزداعى قازاقستان حالقىنا جولداۋىندا ايتىلعان ساياسي باستامالارىن جۇزەگە اسىرۋعا باعىتتالعان التى زاڭعا قول قويدى. قاسىم- جومارت توقايەۆ مەملەكەت باسشىسى بولىپ سايلانعالى بەرى كەزەڭ- كەزەڭىمەن ساياسي وزگەرىستى دايەكتى تۇردە جۇزەگە اسىرىپ كەلەدى. وسى جىلدار ىشىندە ساياسي پروتسەستىڭ باسەكەگە قابىلەتتىلىگى مەن اشىقتىعىن ارتتىرۋعا باعىتتالعان ءتورت ساياسي رەفورما پاكەتى ىسكە اسىرىلىپ، ونىڭ اياسىندا 13 زاڭ قابىلداندى. ساياسي رەفورمالاردىڭ تاعى ءبىر پاكەتىن مەملەكەت باسشىسى ناۋرىز ايىنداعى جولداۋىندا ۇسىنىپ، ماۋسىم ايىنداعى كونستيتۋتسيالىق رەفەرەندۋم ارقىلى جۇزەگە اسىرىلدى»، - دەپ جازدى ە. قارين ءوزىنىڭ Telegram كانالىندا.
وسى ورايدا ول كونستيتۋتسيالىق رەفورما قولدانىستاعى زاڭناماعا وزگەرىستەر مەن تولىقتىرۋلار ەنگىزۋدى تالاپ ەتكەنىن ەسكە سالدى.
«ۇكىمەت كونستيتۋتسيالىق تۇزەتۋلەردى ايقىندايتىن ءتيىستى زاڭ جوبالارىن ازىرلەپ، قىركۇيەكتە پارلامەنتكە ۇسىنعان بولاتىن. بۇل زاڭدار الدىمەن ماجىلىستە مۇقيات جانە جان- جاقتى قارالىپ، ماقۇلداندى. سودان كەيىن سەناتتا قابىلدانىپ، ەندى بۇگىن پرەزيدەنت جاريا تۇردە قول قويدى. التى زاڭنىڭ قابىلدانۋى پرەزيدەنتتىڭ وكىلەتتىكتەرىن بيلىكتىڭ باسقا ينستيتۋتتارىنا قايتا بولۋگە، بيلىكتىڭ وكىلدى تارماعىن قايتا فورماتتاۋعا، سايلاۋ جۇيەسىن جەتىلدىرۋگە، قۇقىق قورعاۋ ينستيتۋتتارىن نىعايتۋعا ىقپال ەتەدى. بۇل تۇرعىدا مەملەكەت باسشىسى باستاماشىلىق ەتكەن اۋقىمدى ساياسي جاڭعىرۋ باعدارلاماسى قۇقىقتىق تۇردە تۇپكىلىكتى رەسىمدەلدى»، - دەدى مەملەكەتتىك كەڭەسشى.
بۇدان بۇرىن حابارلانعانداي، مەملەكەت باسشىسى بيىل ماۋسىم ايىندا وتكەن كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋمنان كەيىن قابىلدانعان ءبىرقاتار ماڭىزدى زاڭعا جاريا تۇردە قول قويدى.
