الماتىدا «راقمەتىن ايتىپ قۇتىلدىم» دەپ مالىمدەگەن رەسەيلىك بلوگەر جازالاندى

پوليتسەيلەر ونى جاۋاپكەرشىلىككە تارتتى، - دەپ حابارلايدى قازاقپارات Polisia.kz سايتىنا سىلتەمە جاساپ.

الەۋمەتتىك جەلىدە رەسەيلىك بلوگەردىڭ جول ەرەجەسىن بۇزىپ، كولىكتى دۇرىس ەمەس جەرگە قويعانى، كەيىن ونىڭ ءنومىرىن شەشىپ الىپ كەتكەنىن، ءبىراق «راقمەتىن ايتىپ» بارلىق ماسەلەنى شەشكەنىن مالىمدەگەن ۆيدەوسى جاريالانعان.

كەيىن الماتى پوليتسياسى جول ەرەجەسىن ورەسكەل بۇزعان رەسەي فەدەراتسياسىنىڭ 21 جاستاعى ازاماتى جاۋاپقا تارتىلعانىن مالىمدەگەن.

جەرگىلىكتى پوليتسيا قىزمەتى باسقارماسىنىڭ قىزمەتكەرلەرى وعان مىنا قۇقىقبۇزۋشىلىقتار بويىنشا حاتتامالار تولتىرعان:

- ق ر اكىمشىلىك قۇقىق بۇزۋشىلىق تۋرالى كودەكستىڭ 601-بابى بويىنشا - «جول بەلگىلەرىمەن نەمەسە جولدىڭ ءجۇرۋ بولىگىندەگى تاڭبالارمەن كورسەتىلگەن تالاپتاردى ساقتاماۋ»؛

- ق ر اكىمشىلىك قۇقىق بۇزۋشىلىق تۋرالى كودەكستىڭ 596-بابىنىڭ 2-بولىگى بويىنشا - «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ، سول سياقتى ۇيىمداسقان كولىك كولونناسىن نەمەسە جاياۋ كولوننانى كەسىپ ءوتۋ نە ونىڭ اراسىنان ورىن الۋ»؛

- ق ر اكىمشىلىك قۇقىق بۇزۋشىلىق تۋرالى كودەكستىڭ 591-بابىنىڭ 1-بولىگى بويىنشا - «كولىك قۇرالىن باسقارۋ كەزىندە جۇرگىزۋشىنىڭ تەلەفوندى نە راديوستانسيانى پايدالانۋى».