پرەزيدەنتتىڭ وكىلەتتىك مەرزىمىن قىسقارتۋدى كوزدەيتىن زاڭ قابىلداندى
«زاڭ جوباسىنىڭ ماقساتى - پرەزيدەنتتىڭ وكىلەتتىگىن قىسقارتۋ، پارلامەنت پالاتالارىن قالىپتاستىرۋ ءتارتىبىن جانە ونىڭ ءبىرقاتار فۋنكتسيالارىن قايتا قاراۋ، پارلامەنتتەگى زاڭ شىعارۋ پروتسەسىنىڭ جاڭا ەرەجەلەرى، ارالاس سايلاۋ جۇيەسىنە كوشۋ، سونداي- اق سايلاۋ پروتسەسىن جاڭعىرتۋ بولىگىندە جولداۋ اياسىنداعى ساياسي رەفورمالاردىڭ تولىققاندى ىسكە اسىرىلۋىن قامتاماسىز ەتۋ. تۇزەتۋلەردى ءۇش نەگىزگى باعىتقا بولۋگە بولادى. بىرىنشىدەن، زاڭ جوباسى پرەزيدەنتتىڭ جەرگىلىكتى اتقارۋشى ورگانداردىڭ اكتىلەرىنە قاتىستى وكىلەتتىكتەرىن قىسقارتۋعا جانە بارلىق دەڭگەيدەگى اكىمدەردى بوساتۋعا قاتىستى ەرەجەلەردى قامتيدى. سونداي- اق، پارلامەنت سەناتىنىڭ دەپۋتاتتارىن، كونستيتۋتسيالىق سوتتىڭ جانە جوعارى سوت كەڭەسىنىڭ ءتوراعالارىن تاعايىنداۋ جونىندەگى پرەزيدەنتتىڭ وكىلەتتىكتەرىن وزگەرتۋگە قاتىستى تۇزەتۋلەر كوزدەلگەن»، - دەدى ق ر ادىلەت ءمينيسترى قانات مۋسين.
سونىمەن قاتار، پارلامەنت پالاتالارىندا زاڭداردى قاراۋ جانە قابىلداۋ ءتارتىبىن قايتا قاراۋعا قاتىستى تۇزەتۋلەر بەكىتىلەدى.
«ارالاس سايلاۋ جۇيەسىنە كوشۋگە بايلانىستى دەپۋتاتتى كەرى قايتارىپ الۋ تەتىگىن قوسا العاندا، پارلامەنت ماجىلىسىندە جانە ءماسليحاتتاردا ارالاس سايلاۋ جۇيەسىنىڭ جۇمىس ىستەۋىنە باعىتتالعان ەرەجەلەردى سايلاۋ زاڭناماسىندا قامتۋ ۇسىنىلادى. سونىمەن قاتار، سايلاۋ پروتسەسىن جەتىلدىرۋ بويىنشا تۇزەتۋلەر قاراستىرىلعان. ولار: الەۋمەتتىك جەلىلەردە ۇگىت جۇرگىزۋگە رۇقسات بەرۋ، سايلاۋ قورلارىنا ەرىكتى نەگىزدەگى قايىرىمدىلىقتىڭ شەكتى مولشەرىن بەلگىلەۋ. بۇدان باسقا، اۋداندار مەن وبلىستىق ماڭىزى بار قالالاردىڭ اكىمدەرىن سايلاۋ كەزەڭ- كەزەڭىمەن ەنگىزىلەدى. بۇل تاسىلدەردىڭ بارلىعى ەگجەي- تەگجەيلى جانە جان- جاقتى تالقىلاندى»، - دەدى مينيستر.
ءوز كەزەگىندە سەنات ءتوراعاسى ماۋلەن اشىمبايەۆ اتالعان زاڭ ارقىلى ءبىرقاتار ماڭىزدى قۇقىقتىق نورمالار كونستيتۋتسيانىڭ جاڭا ەرەجەلەرىنە سايكەستەندىرىلەتىنىن ايتتى.
«ماسەلەن، ەل پرەزيدەنتىنىڭ وكىلەتتىك مەرزىمى ءبىر رەتتىك 7 جىلدىق كەزەڭمەن شەكتەلەدى. سونىمەن قاتار، ءماجىلىس پەن ءماسليحاتتاردى قالىپتاستىرۋدىڭ ارالاس ۇلگىسىن ەنگىزۋگە قۇقىقتىق نەگىز قالىپتاستىردىق. قابىلدانعان زاڭ اكىمدەردى سايلاۋ جۇيەسىن اۋداندار مەن وبلىستىق ماڭىزى بار قالالاردا كەزەڭ- كەزەڭمەن قولدانۋ ماسەلەلەرىن دە قامتيدى. سەنات پەن ءماجىلىستىڭ زاڭ شىعارۋ پروتسەسىندەگى قىزمەتتەرىنە قاتىستى جاڭا نورمالار قابىلداندى»، - دەدى م. اشىمبايەۆ.
زاڭ جوباسىندا قازاقستان رەسپۋبليكاسىنىڭ 8 كونستيتۋتسيالىق زاڭىنا تۇزەتۋلەر ەنگىزۋ كوزدەلگەن.
سونىمەن قاتار، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭعا سەناتتى قالىپتاستىرۋ ءتارتىبىن جانە ونىڭ ءبىرقاتار فۋنكتسيالارىن قايتا قاراۋعا، ارالاس سايلاۋ جۇيەسىن ەنگىزۋگە، ماجىلىستەگى قازاقستان حالقى اسسامبلەياسىنىڭ كۆوتاسىن الىپ تاستاۋعا، پارلامەنت پالاتالارىندا زاڭداردى تالقىلاۋ جانە قابىلداۋ ءتارتىبىن قايتا قاراۋعا، ۇكىمەتتىڭ زاڭ كۇشى بار ۋاقىتشا نورماتيۆتىك قۇقىقتىق اكتىلەردى قابىلداۋىنا قاتىستى جانە باسقا دا نورمالار ەنگىزىلگەن.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا كوزدەلگەن تۇزەتۋلەر ءماجىلىس پەن ءماسليحاتتار دەپۋتاتتارىن ماجوريتارلىق جۇيە بويىنشا سايلاۋ، ماجوريتارلىق جۇيە بويىنشا سايلانعان ءماجىلىس پەن ءماسليحاتتار دەپۋتاتتارىن كەرى شاقىرتىپ الۋ، اۋداندار مەن وبلىستىق ماڭىزى بار قالالاردىڭ اكىمدەرىن سايلاۋ، اۋماقتىق سايلاۋ كوميسسيالارىن كاسىبي نەگىزگە اۋىستىرۋ، سايلاۋ الدىنداعى ۇگىت كەزەڭىندە الەۋمەتتىك جەلىلەردەگى ۇگىت جونىندەگى، سونداي- اق سايلاۋ قورلارىنا بەرىلەتىن قايىرىمدىلىقتاردىڭ شەكتى مولشەرىنە، سايلاۋ ناۋقانىنا قاتىسۋشىلاردىڭ بارلىعىنىڭ قارجىلىق اشىقتىعىن قامتاماسىز ەتۋگە قاتىستى شارالار جونىندەگى ەرەجەلەردى زاڭنامالىق رەتتەۋگە باعىتتالعان.
اۆتور
رۋسلان عابباسوۆ
