قىتايداعى ەڭ ۇزدىك اكتريسا اتانعان قازاق قىزى كىم
وسىناۋ ەڭ جوعارى ماراپاتقا العاش رەت ەتينيكالىق قازاق قىزى ريزا ءالىمجان قىزى «Minning Town» تەلەحيكاياسىنداعى ءرولى ءۇشىن «ۇزدىك اكتريسا» نوميناتسياسىنىڭ يەگەرى اتاندى. قىتايدىڭ كينو جۇلدىزىنا اينالعان، ونەر ورىندە ميلليونداعان باسەكەلەستەرىنىڭ الدىن وراپ، تالانتىمەن تالايدى تاڭداي قاقتىرىپ جۇرگەن قانداسىمىز ريزا ءالىمجان قىزىنىڭ ونەر جولى تۋرالى شولۋىمىزدى ۇسىنامىز، دەپ حابارلايدى قازاقپارات.
اشىق دەرەككوز بويىنشا، قىتايدا ونەرىمەن كورەرمەن كوزايىمىنا اينالعان ريزا ءالىمجان قىزى كينو سالاسىندا Reyizha Alimjan نەمەسە Rayza دەگەن ەسىمىمەن تانىمال بولعان. ول 1986 -جىلى 15 - شىلدەدە بەيجىڭ قالاسىندا دۇنيەگە كەلگەن. اكەسى ءالىمجان نۇرعازى ۇلى مەن اناسى زايىمحان بەيجىڭ قالاسىنداعى ورتالىق ۇلتتار باسپاسىنىڭ قازاق رەداكسياسىندا جۇمىس ىستەيدى. ولار 1970 -جىلدارى شىنجاڭنان بەيجىڭگە ستۋدەنت بولىپ بارىپ، جۇمىس ىستەپ، قونىستانىپ قالعان ەكەن.
ريزا بەيجىڭدە العاش مەكتەپكە بارعاندا سىنىپتاستارى ءتۇر- سيپاتى وزدەرىنەن وزگەشە، ەرەكشە بالاعا جاتىرقاپ قاراپ، شىنجاڭ ولكەسىنەن كەلگەنىن ءبىلىپ، «كاۋاپشى» (شاشىلىق ءپىسىرۋشى) دەپ ات قويعان. مۇنى تۇسىنە الماعان ريزا اناسىنان سەبەبىن سۇراعاندا، اناسى «بالام، تەك وقۋىڭدى جاقسى وقى، ءبىلىمدى، جاقسى بالا بولساڭ، ەلدىڭ بارلىعى ساعان قۇرمەتپەن قارايتىن بولادى» دەيدى. بۇل ءسوز ونىڭ جىگەرىن جانىپ، جان- جاقتى تالاپتانۋىنا وڭ اسەرىن تيگىزەدى.
ريزا ءان ايتۋعا، كىتاپ وقۋعا ىنتالى بولۋىمەن بىرگە، مەكتەپتە ساباعىن دا ۇزدىك وقىعان. ول 15 جاسىندا ءسان الەمىنە كەزدەيسوق قادام باسىپ، تانىمال «Ruili» جۋرنالى ۇيىمداستىرعان ءسان بايقاۋىنا قاتىسىپ جۇلدەگەر اتانادى. وسىلايشا ريزا «Ruili» جۋرنالىنىڭ تاريحىنداعى مۇقاباسىنا سۋرەتى باسىلعان ەڭ جاس مودەل بولۋمەن بىرگە، 3 جىل وسى باسىلىمدا كەلىسىمشارتپەن جۇمىس ىستەيدى.
ايتسەدە، ريزا مودەل بولۋدان كورى اكتەر بولۋعا ىنتالى بولىپ، 2002 -جىلى بەيجىڭ كينو اكادەمياسىنىڭ اكتەرلىك فاكۋلتەتىنە وقۋعا تۇسەدى. ول كاسىبي ءبىلىم الىپ، وقۋىن اياقتاعان سوڭ «كارتاڭىزدى اشىڭىز» فيلمىنە ءتۇسىپ، كينو يندۋسترياسىنداعى تۇڭعىش ونەر ساپارىن باستايدى.
وسىدان كەيىن تالانىتتى قانداسىمىز اۋديتورياسى ۇلكەن قىتايدىڭ كينو يندۋسترياسىنا قۇلاش ۇرىپ، ءوز قولتاڭباسىمەن كورەرمەن ىقىلاسىنا بولەنگەن كوپتەگەن فيلمدەرگە تۇسەدى. ول كومەديالىق «سۋايتتار شايقاسى» كينوسىندا، پاتشا ورداسىنداعى قىرىقپىشاق بولىپ قىرىلىسىپ جاتاتىن كۇندەس حانىمدار تۋرالى «گارەمدەگى چجۋان حۋاننىڭ ءومىرى» تەلەحيكاياسىندا، بۇگىنگى قالا ومىرىندەگى ماحاببات تاقىرىبى ارقاۋ بولعان «ماحاببات پا، وعان مەن دايىن» تەلەفيلمىندە جانە «ماحاببات بۇيرىقتان اسا المايدى»، «ءبىز عانا بىلەتىن مەكەن» («Somewhere Only We Know») ، «شىندىق ايتىلمايتىن ايماق»، «قارلى دالاداعى ايەل پاتشا»، «قۋعىنداۋ» سەكىلدى كوپتەگەن فيلمدە ءرولىن ءساتتى سومداپ شىعادى.
ريزا 2017 -جىلى «قۋعىنداۋ» فيلىمىندەگى ءرولى ءۇشىن XX شاڭحاي حالىقارالىق كينو فەستيۆالىندە «ب ا ق- تىڭ نازارىن ءجيى اۋدارعان اكتريسا» نوميناتسياسىندا ماراپاتتالادى.
ال، 2019 -جىلى «چاڭانداعى ءبىر تاۋلىك» اتتى تەلەفيلمىندەگى ءرولى ءۇشىن قىتايدىڭ Huading بايقاۋىندا ەڭ «ۇزدىك اكتريسا» اتانادى.
سونداي- اق، ريزانىڭ 2020 -جىلى تۇسكەن «تاۋ- تەڭىزدەي ماحاببات» فيلمى 2021 -جىلدىڭ قاڭتار ايىندا كورەرمەنگە جول تارتىپ، حالىقتىڭ جاقسى باعاسىنا يە بولدى. ال، ريزا سوڭعى قۋانىشتى جاڭالىعىن كوپشىلىكپەن Weibo جەلىسىندە ءبولىسىپ، ءوزىنىڭ انا اتانىپ، قىزى دۇنيەگە كەلگەنىن جاريالاعان.
«Minning Town» تەلەحيكاياسى وتكەن جىلى قاڭتار ايىندا قىتايداعى كورەرمەنى ەڭ كوپ بەس تەلەارنادا قاتار كورسەتىلىپ، جۇرت وتە جوعارى باعالاعان ەدى. وعان قىتايدىڭ نينسيا دۇنگەن اۆتونوميالىق رەگيونىنىڭ سيحايگۋ ايماعىنداعى اۋىل تۇرعىندارىنىڭ كەدەيلىكپەن كۇرەسى ارقاۋ بولادى. تەلەحيكايادا ريزا قازىمىر اكەنىڭ قاتال ۇكىمىنە مويىن ۇسىنباي، تاعدىرىن ءوز قولىنا العان قايسار قىز لي شۋيحۋانىڭ بەينەسىن سومداپ، اكتەرلىك شەبەرلىگىمەن كورەرمەندەردى ءتانتى ەتەدى.
1- قاراشا كۇنى كەشتە بەيجىڭدەگى شوۋگان ارەناسىندا وتكەن سىيلىق يەگەرلەرىن ماراپاتتاۋ راسىمىندە ريزا ءالىمجان قىزى تولقىپ تۇرىپ:
«مەن باقىتتى ءھام تالايلى جان ەكەنمىن. قازىلار القاسىنا، ەڭبەگىمدى باعالاعان كورەرمەندەرگە مىڭ العىس. وزدەرىڭىزگە انا تىلىمدە العىسىمدى بىلدىرۋگە رۇقسات ەتىڭىزدەر: راحمەت!»، - دەپ اعىنان جارىلدى.
ايتا كەتەيىك، ريزا ءالىمجان قىزى بۇل سىيلىق تاعايىندالعالى بەرى «ۇزدىك اكتريسا» اتاعىن العان تۇڭعىش قازاق قىزى بولىپ وتىر.
اۆتور
باقىتجول كاكەش