تۇركياعا وقۋعا تۇسپەك بولعان قازاقستاندىقتار الاياقتىق قۇربانى بولعان
استانا. قازاقپارات - بالالارىن شەتەلدە وقىتۋعا ميلليونداعان اقشا بەرگەن قازاقستاندىقتار ىقتيمال الاياقتىق قۇربانى بولعان، - دەپ حابارلايدى Tengrinews.kz ءتىلشىسى.
2021 -جىلى استانا قالاسىنىڭ تۇرعىنى بولاشاق ستۋدەنتتەرگە ءتىل ۇيرەتىپ، تۇركياداعى ۋنيۆەرسيتەتتەردىڭ بىرىنە وقۋعا تۇسىرۋگە ۋادە بەرگەن كومپانيامەن كەلىسىمگە كەلگەن. الايدا كەلىسىمنىڭ سوڭعى تارماعى ورىندالماعان.
«كومپانيامەن كەلىسىمشارتقا وتىردىق، قىزىمىز ءتىلدى ۇيرەندى، بيىل وقۋعا ءتۇسۋى كەرەك ەدى. ءبىراق ولار بىزگە بەرۋى ءتيىس بولعان سەرتيفيكات ەشقايدا جارامايتىن بولىپ شىقتى، ءبىراق بۇل سەرتيفيكات وقۋعا تۇسۋگە 100 پايىز كەپىلدىك بەرەتىنىن ايتقان ەدى. تۇركياعا كەلگەنىمىزدە ۋنيۆەرسيتەتتەگىلەر قۇجاتتارىمىز جوقتىعىن، سوندىقتان ءبىزدى قابىلداي المايتىندارىن ايتتى»، - دەيدى ايجان.
استانالىق ايەلدىڭ ايتۋىنشا، قازاقستاننان تاعى بىرنەشە وتباسى ءدال وسىنداي جاعدايعا تاپ بولعان. ولاردىڭ ءبارىنىڭ اڭگىمەسى ءبىر - تۇركياعا كەلگەننەن كەيىن ۋنيۆەرسيتەت ولاردى قابىلداماعان، ويتكەنى قۇجاتتارى تاپسىرىلماعان.
«ءبىز كومپانياعا شامامەن 1 ميلليون 600 مىڭ اقشا سالدىق. ءبىز اقشانى قايتارعىمىز كەلەدى جانە الداۋلار مەن جاڭا قۇرباندار بولماس ءۇشىن كومپانيا جابىلعانىن قالايمىز»، - دەپ قوستى ايەل.
استانا پوليتسيا دەپارتامەنتى وقيعانى راستاپ، بۇل فاكت بويىنشا سوتالدى تەرگەۋ ءجۇرىپ جاتقانىن حابارلادى.
«بىرنەشە تۇرعىن پوليتسياعا بەيتانىس تۇلعالار الاياقتىق جانە سەنىمگە قيانات جاساۋ ارقىلى اقشاسىن يەمدەنىپ العانى تۋرالى ۇجىمدىق ارىزبەن جۇگىنگەن. تەرگەۋ بارىسىندا كومپانيا جابىرلەنۋشىلەرمەن تۇركيادا ءتىل كۋرستارىن وتكىزىپ، كەيىن ولاردى ۋنيۆەرسيتەتكە وقۋعا ءتۇسىرۋ تۋرالى كەلىسىمگە وتىرعانى انىقتالدى. دەرەك بويىنشا ق ر قىلمىستىق كودەكسىنىڭ 190-بابى بويىنشا سوتالدى تەرگەۋ امالدارى جۇرگىزىلىپ جاتىر»، - دەدى تىلشىگە استانا پوليتسيا دەپارتامەنتى وكىلدەرى.
