ماگيستراتۋراعا تۇسەتىن تالاپكەرلەر بۇگىننەن باستاپ كەشەندى تەستىلەۋگە تىركەلە الادى

عىلىم جانە جوعارى ءبىلىم مينيسترلىگىنىڭ مالىمەتىنشە، تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا 2022 -جىلعى 18-قاراشاعا دەيىن جۇرگىزىلەدى.

تەستىلەۋدىڭ ءوزى 28-قاراشا مەن 11-جەلتوقسان ارالىعىندا وتەدى.

تىركەلۋ كەزىندە ءتۇسۋشى تەستىلەۋدى تاپسىرۋ قالاسىن ءوز ەركىمەن تاڭدايدى.

ۇمىتكەرلەر وتىنىشتەردى قابىلداۋ مەرزىمى اياقتالعانعا دەيىن (18- قاراشاعا دەيىن) ءبىلىم بەرۋ باعدارلامالارىنىڭ توبى، ءتىلى جانە تەستىلەۋدى تاپسىرۋ ورنى بويىنشا وتىنىشكە وزگەرىستەر ەنگىزە الادى.

تەستىلەۋ كۇنى تۋرالى اقپارات تالاپكەردىڭ جەكە كابينەتىندە 22-قاراشادا جاريالانادى.

«كەشەندى تەستىلەۋ ەلەكتروندى فورماتتا وتكىزىلەدى جانە ءۇش بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. بارلىعىنا 3 ساعات 55 مينۋت بەرىلەدى. شەت ءتىلىن مەڭگەرگەنىن راستايتىن حالىقارالىق سەرتيفيكاتتاردىڭ ءبىرى بار وقۋعا تۇسۋشىلەر شەت ءتىلى بويىنشا تەست تاپسىرۋدان بوساتىلادى»، - دەپ ءتۇسىندىردى ق ر عىلىم جانە جوعارى ءبىلىم ۆيتسە- ءمينيسترى قۋانىش ەرعاليەۆ.