ۇلىتاۋدا تۋريستىك ورتالىق پەن ساناتوري سالىنادى
استانا. قازاقپارات - ۇلىتاۋ وبلىسىندا جاڭا تۋريستىك ورتالىق پەن جاڭا اۋە رەيستەرى اشىلادى. بۇل تۋرالى ۇلىتاۋ وبلىسىنىڭ اكىمى بەرىك ءابدىعالي ۇلى ايتتى، دەپ حابارلايدى قازاقپارات ءتىلشىسى.
ايتا كەتەيىك، بۇگىن ۇكىمەتتە ۇلىتاۋ وبلىسىن قايتا جاڭعىرتۋ جونىندەگى كەشەندى جوسپار تانىستىرىلدى.
«وڭىرگە تۋريستەردى تارتۋ ءۇشىن جەزقازعان قالاسىندا قوناق ءۇي كەشەندەرى، ۇلىتاۋ اۋدانىندا تۋريستىك ورتالىق جانە ساناتوري ۇلگىسىندەگى دەمالىس ءۇيى سالىنادى. كولىك جانە لوگيستيكا باعىتتارى بويىنشا وبلىس ورتالىعىندا بىرنەشە جوبا قارالىپ جاتىر. سونىڭ ىشىندە، جاقىن ارادا شىمكەنت قالاسىمەن جاڭا اۋە قاتىناسىن اشۋ جوسپارلانۋدا»، - دەدى بەرىك ءابدىعالي ۇلى ۇكىمەتتىڭ بۇگىنگى وتىرىسىندا.
سونىمەن قاتار 227 ك م وبلىستىق ماڭىزى بار اۆتوجولدار مەن 118 ك م قالاىشىلىك جانە كەنتىشىلىك جولداردى سالۋ، رەكونسترۋكتسيالاۋ جانە جوندەۋ جوسپارلانىپ وتىر.
ودان بولەك، مەكتەپكە دەيىنگى ءبىلىم بەرۋ جانە مەديتسينالىق مەكەمەلەردىڭ، ينفراقۇرىلىمنىڭ جەتىسپەۋشىلىگى پروبلەمالارىن شەشۋ ءۇشىن 4 بالاباقشا، 4 وقۋشىلار سارايى جانە 5 دەنساۋلىق ساقتاۋ نىسانىن سالۋ كوزدەلگەن. سونداي-اق، كەشەندى جوسپاردا وبلىستىڭ 10 سپورت نىسانىن سالۋ مەن رەكونسترۋكتسيالاۋ كوزدەلگەن.
بۇعان دەيىن بەرىك ءابدىعالي ۇلى ءوڭىردىڭ شەشىلمەي جاتقان وزەكتى ماسەلەلەرى تۋرالى ايتىپ بەردى.
