نيدەرلاندتا كاسىپپەن اينالىسىپ وتىرعان شىڭعىسحان قازاقستان ەسىمدى وتانداسىمىز بار

ول بۇل ستارتاپتى ستۋدەنت كەزىندەگى دوسى بريتانيالىق ماكس شالوۋمەن بىرگە قولعا العان. قازىر ولاردىڭ ەلەكترۆەلوسيپەدتەردى جالعا بەرۋ قىزمەتى وسى ەلدىڭ 8 قالاسىندا بار. نيدەرلاندتى قىزعالداقتار عانا ەمەس ۆەلوسيپەدتەر ەلى دەپ تە اتايدى. سەبەبى ەلدە كولىكتىڭ بۇل ءتۇرىن تىزگىندەيتىندەر كوپ. سوندىقتان دا جاس كاسىپكەرلەر وسى ىسپەن اينالىسۋدى ءجون كورىپتى. ال ولاردىڭ كومپانياسىنان ەلەكترلى ۆەلوسيپەدتى جالعا الۋ ءۇشىن تەك ارنايى قوندىرعىنى جۇكتەسەڭىز جەتكىلىكتى. ساپار مينۋتىنا 15 سەنتتى قۇرايدى. 10 ەۋروعا تاۋلىكتىك ابونومەنت ساتىپ الۋعا بولادى. ايلىق، جىلدىق كارتا دا بار.

شىڭعىسحان قازاقستان، ۆەلوشەرينگ ستارتاپىنىڭ نەگىزىن قالاۋشى:

- مۇندا بارلىق جەردە ۆەلوسيپەدكە ارنالعان جولدار بار. وتە ىڭعايلى. العاشقى تۇراعىمىزدى پاندەميا كەزىندە اشتىق. سوڭعى قارجىمىزدى جۇمساپ بيزنەس ساياباعىندا 10 ۆەلوسيپەدكە ارنالعان ورىن دايىنداعان ەدىك. ءبىراق ىندەتتەن كوشەلەردە ادام بولماي ولاردى ەشكىم قولدانبادى. سالدارىنان كوماندامىزدا ماكس ەكۋىمىز عانا قالدىق. العاشقى باستامامىز ناتيجە بەرمەسە دە، مويىمادىق. كوپ ۇزاماي جوبامىزعا ينۆەستيتسيا تاپتىق.

جاس جىگىتتەر ينۆەستورلاردى الەۋمەتتىك جەلىلەر مەن عالامتوردان ىزدەيدى. سودان گااگادا 40 ۆەلوسيپەدكە ارنالعان تۇراق اشادى. قازىر كاسىپتەرى كەڭەيىپ، جالعا بەرەتىن ۆەلوسيپەد سانى 250-گە جەتكەن. قاراماعىندا 20 ادام جۇمىس ىستەيدى. پايدالى ءىس ىستەپ، قورشاعان ورتانى قورعاۋ يدەياسى ءبارىن بىرىكتىرگەن ورتاق مۇرات.

شىڭعىسحان قازاقستان، ۆەلوشەرينگ ستارتاپىنىڭ نەگىزىن قالاۋشى:

- بىزدە ۆەلوسيپەد ساتىپ العاننان گورى وسى قىزمەتتى پايدالانعاندى ءجون سانايتىن تۇرعىندار كوپ. سەبەبى ولار ۆەلوسيپەدتى جوندەۋ، قۋاتتاندىرۋ سياقتى ماسەلەلەرگە باس قاتىرعىسى كەلمەيدى. ونىڭ بارلىعى ءبىزدىڭ مويىنىمىزدا. ەندى كەلەسى جىلى ساموكاتتى جالعا بەرۋ قىزمەتىن ىسكە قوسامىز. ال كومپانيادا بۇل ىسپەن اينالىساتىن ارنايى قىزمەتكەرلەر بار. ولار ءار تۇراققا بارىپ ۆەلوسيپەدتەردى قۋاتتاندىرىپ، تەكسەرىپ وتىرادى.

جاستار قايىرىمدىلىققا دا كوڭىل بولەدى.

شىڭعىسحان قازاقستان، ۆەلوشەرينگ ستارتاپىنىڭ نەگىزىن قالاۋشى:

- ءبىز قايىرىمدىلىق ماقساتىندا ەسكى ۆەلوسيپەدتەردى جينايمىز. سودان كەيىن ولاردى جوندەپ تۇرمىسى تومەن وتباسىلاردىڭ بالالارىنا بەرەمىز.

شىڭعىسحان ءوزىنىڭ بيزنەسىن ەۋروپا مەن ازيانىڭ وزگە دە ەلدەرىن اشۋدى كوزدەپ وتىر.

www.24.kz