سايلاۋ: داۋىس بەرۋ كۇنىندە مۇمكىندىگى شەكتەۋلى جاندارعا ينۆاتاكسي قىزمەت كورسەتەدى

نۇر-سۇلتان. قازاقپارات - بۇگىن ق ر ورتالىق سايلاۋ كوميسسياسى جانىنان قۇرىلعان مۇمكىندىگى شەكتەۋلى ازاماتتاردىڭ قۇقىقتارىن قورعاۋ جونىندەگى جۇمىس توبىنىڭ وتىرىسى ءوتتى.

جيىندا 20- قاراشادا وتەتىن كەزەكتەن تىس پرەزيدەنت سايلاۋىندا مۇمكىندىگى شەكتەۋلى جانداردىڭ داۋىس بەرۋى ءۇشىن قولايلى جاعداي جاساۋ ماسەلەسى قارالدى، دەپ حابارلايدى قازاقپارات ءتىلشىسى.

«ورتالىق سايلاۋ كوميسسياسىنىڭ قاۋلىسىمەن مۇمكىندىگى شەكتەۋلى ازاماتتاردىڭ قۇقىقتارىن قامتاماسىز ەتۋ جونىندەگى جۇمىس توبىنىڭ ەرەجەسىن جانە جۇمىس توبىنىڭ جاڭا قۇرامىن بەكىتتىك. جۇمىس توبىنىڭ قۇرامىنا 19 ادام، ونىڭ ىشىندە مۇمكىندىگى شەكتەۋلى تۇلعالار قوعامدىق بىرلەسىكتەرىنىڭ 17 ءى وكىلى كىردى»، - دەپ اتاپ ءوتتى وتىرىستى اشقان و س ك ءتوراعاسى نۇرلان ءابدىروۆ.

وسىدان كەيىن ق ر و س ك مۇشەسى اناستاسيا شەگورتسوۆا جەرگىلىكتى اتقارۋشى ورگاندار ۇسىنعان دەرەكتەرگە سايكەس، سايلاۋ ۋچاسكەلەرىنىڭ 92 پايىزى پاندۋستارمەن، 82,3 پايىزى عيماراتقا كىرە بەرىستەگى تاكتيلدى بەلگىمەن قامتاماسىز ەتىلگەنىن اتاپ ءوتتى. سونىمەن قاتار داۋىس بەرۋ كۇنىندە 253 ۋچاسكەگە پاندۋس، 525 ۋچاسكەگە كىرە بەرىستەگى تاكتيلدى بەلگى ورناتىلاتىندىعىن ايتتى.

«ۋچاسكەلەردىڭ 95,2 پايىزىندا مۇمكىندىگى شەكتەۋلى ازاماتتار ءۇشىن ارناۋلى بۇرىش جابدىقتاۋ جوسپارلانىپ وتىر. سونىمەن قاتار ۋچاسكەلەردىڭ 94,1 پايىزىندا كابينالاردى كرەسلو-كولياسكامەن جۇرەتىن ازاماتتارعا قولجەتىمدى قىلىپ جابدىقتاۋ كوزدەلىپ وتىر. داۋىس بەرەتىن كۇنى ينۆاتاكسي قىزمەتى جۇمىلدىرىلاتىن بولادى»، - دەدى ول.