گەرمانيا قازاقستاننىڭ حالىقارالىق ماسەلەلەردەگى ۇستانىمىن قولدايدى - اننالەنا بەربوك

بۇل تۋرالى ەلوردادا گەرمانيانىڭ فەدەرالدىق سىرتقى ىستەر ءمينيسترى اننالەنا بەربوك ايتتى، دەپ حابارلايدى قازاقپارات ءتىلشىسى.

«قازاقستان حالىقارالىق ءتارتىپتى قولدايتىنىن جانە ورتاق كۇش-جىگەرمەن وسى ءتارتىپتى ساقتاۋ ءۇشىن بارلىعىن ىستەپ جاتقانىن ءجيى ايتىپ ءجۇر. قازاقستان وسىنداي كۇردەلى جاعدايدا ايقىن پوزيتسيانى ۇستانىپ كەلەدى. سوندىقتان گەرمانيا جاعى بۇل ۇستانىمعا قۇرمەتپەن قارايدى»، - دەدى ا. بەربوك قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىمەن كەزدەسۋدەن كەيىن وتكەن بريفينگىدە.

ونىڭ پايىمىنشا، قازىر الەم ەلدەرى وزدەرىنىڭ ىقپالىن كەڭەيتۋگە تىرىسىپ جاتىر. وسى ورايدا ەكونوميكالىق كەلىسىمشارتتار ارقىلى بايلانىستار نىعايىپ كەلەدى.

«گەرمانيا ءادىل ءارى تەڭ دارەجەدە، ەشقانداي ماجبۇرلەۋسىز، جاسىرىن شارتتارسىز بەكىتىلگەن ەكونوميكالىق قارىم-قاتىناستار بولعانىن قالايدى»، - دەدى مينيستر.

سونىمەن قاتار ول قازاقستاندا تازا ءارى ەكولوگيالىق ءتيىمدى «جاسىل» سۋتەگى شىعاراتىن الەمدەگى ەڭ ءىرى كاسىپورىنداردىڭ ءبىرىن سالۋ جوباسىنا توقتالدى. وسى جوبانى جۇزەگە اسىرۋدا قازاقستاننىڭ الەۋەتى جوعارى.

«گەرمانيانىڭ كاسىپورىندارى سۋتەگى، جەل جانە كۇن ەنەرگياسى جوبالارىندا الدىڭعى قاتاردا تۇر. ءبىز استانادا سۋتەگى ديپلوماتياسى كەڭسەسىن اشۋدى جوسپارلاپ وتىرمىز. بۇل بيۋرو ساراپشىلار مەن مامانداردى تارتۋ تۇرعىسىندا ماڭىزدى بولماق. وسى ورايدا ماڭىزدى جوبالاردى ناقتى ىسكە اسىرۋعا جاعداي جاسالادى»، - دەدى اننالەنا بەربوك.

مۇنىمەن قوسا ول قازاقستان قازىرگى كەزدە ماڭىزدى رەفورمالاردى ىسكە اسىرىپ جاتقانىن اتاپ ءوتتى.

«ءبىز ساياسي رەفورما، زاڭ ۇستەمدىگى، ادام قۇقىقتارى جونىندەگى ديالوگتى كەڭەيتكىمىز كەلەدى. اشىق، كۇشتى جانە وزىنە سەنىمدى ازاماتتىق قوعام يننوۆاتسيالار مەن تابىستى بولاشاققا جول باستايتىنىنا سەنىمدىمىن»، - دەدى گەرمانيا ءمينيسترى.

وسىعان دەيىن قازاقستاننىڭ سىرتقى ىستەر ءمينيسترى مۇحتەر تىلەۋبەردى ەلدە نەمىس ينۆەستورلارىنا بارىنشا قولايلى جاعداي جاسالىپ وتىرعاندىعىن ايتقان ەدى.