قازاقستان ت م د اياسىنداعى ىنتىماقتاستىقتى كەڭەيتۋگە مۇددەلى - سمايىلوۆ
«وتكەن جىلى ت م د 30 جىلدىق مەرەيتويىن اتاپ ءوتىپ، بۇگىندە دوستاستىق دامۋدىڭ جاڭا كەزەڭىنە اياق باستى. وسى جىلدار ىشىندە ۇيىم ءوزىنىڭ قاجەتتىلىگىن دالەلدەپ، ەلدەرىمىز اراسىنداعى دوستىق قارىم-قاتىناستىڭ بەرىك ىرگەتاسىنا اينالدى. كوپقىرلى ىنتىماقتاستىق ءوزارا سەنىم، پراگماتيزم جانە مۇددەلەر تەڭگەرىمىن ساقتاۋ قاعيداتتارىن ەسكەرە وتىرىپ قۇرىلعان»، - دەدى ءاليحان سمايىلوۆ.
ق ر ۇكىمەت باسشىسى مۇنداي ءوزارا ءىس-قيمىل الەمدىك ەكونوميكادا بولىپ جاتقان جاعىمسىز ۇردىستەردى تومەندەتۋگە مۇمكىندىك بەرەتىندىگىن، ءوزارا ءتيىمدى ارىپتەستىكتى دامىتۋعا ىقپال ەتەتىندىگىن باسا ايتتى.
«ۇيىم اياسىندا قابىلدانعان ءىس-شارالاردىڭ ارقاسىندا ءبىلىم بەرۋ، مەديتسينالىق-الەۋمەتتىك، ازاماتتىق-قۇقىقتىق سيپاتتاعى كوپتەگەن ماسەلە ءساتتى شەشىلدى. ازاماتتارىمىزدىڭ دوستاستىق مەملەكەتتەرى اراسىندا ۆيزاسىز ءجۇرىپ-تۇرۋ مۇمكىندىگى بار. قازاقستان ت م د- نىڭ بەلسەندى قاتىسۋشىلارىنىڭ ءبىرى رەتىندە ىنتىماقتاستىقتى كەڭەيتۋگە، الەۋەتتى نىعايتۋعا جانە ونىڭ مۇمكىندىكتەرىن اشۋعا مۇددەلى»، - دەدى ق ر پرەمەر-ءمينيسترى.
