الەۋمەتتىك قىزمەتكەرلەردىڭ جالاقىسى قاشان وسەدى - ۆيتسە-مينيستر جاۋابى

بۇل تۋرالى بۇگىن استانا قالاسىندا اتالعان سالانىڭ ۇزدىك ماماندارىن ماراپاتتاۋ بارىسىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ايتتى، دەپ حابارلايدى قازاقپارات ءتىلشىسى.

«الەۋمەتتىك قىزمەتكەرلەردىڭ جالاقىسى ورتا ەسەپپەن 220 مىڭ تەڭگە. وسىنى ەسكەرە وتىرىپ، ءبىز مىنا «الەۋمەتتىك كودەكستىڭ» اياسىندا الەۋمەتتىك قىزمەتكەرلەردىڭ ستاتۋسىن وزگەرتۋدى، كوتەرۋدى كوزدەپ وتىرمىز. سول زاڭنامانىڭ اياسىندا ءبىرىنشى - مارتەبەسى كوتەرىلەدى، ەكىنشى - ولارعا قويىلاتىن تالاپتار وزگەرەدى، ءۇشىنشى - ولاردىڭ جالاقى ماسەلەسى قارالادى. ول ءۇشىن ءبىزدىڭ مينيسترلىكتە ارنايى جۇمىس توبى قۇرىلعان. وسى جىلدىڭ سوڭىنا دەيىن سول جۇمىس توبى ءوزىنىڭ جالاقى، مارتەبە جايىندا ۇسىنىستارىن بەرەدى. سوسىن ونىڭ بارلىعى زاڭعا ەنگىزىلەتىن بولادى»، - دەپ ءمالىم ەتتى ەربول وسپانوۆ.

ونىڭ ايتۋىنشا، بۇگىندە قازاقستاندا 12 مىڭعا جۋىق الەۋمەتتىك قىزمەتكەر بار. ولار حالىقتىڭ ءارتۇرلى ساناتتارىنا ءومىر ءسۇرۋ ساپاسىن جاقسارتۋ جانە كۇردەلى ومىرلىك جاعدايدان شىعۋ ءۇشىن كومەك كورسەتۋ ماقساتىندا ارناۋلى الەۋمەتتىك قىزمەتتەر كورسەتەدى.

اتالعان سالا ماماندارىنىڭ 45 پايىزى - اۋدان ورتالىقتارى مەن قالالاردا، 30 پايىزى - وبلىس ورتالىقتارى مەن رەسپۋبليكالىق ماڭىزى بار قالالاردا، 25 پايىزى - اۋىل وكرۋگتەرىندە ەڭبەك ەتەدى.