اقتوبە وبلىسىنىڭ تۇرعىنى اۋىلىنا كوشىپ كەلگەندەرگە باسپانا، جۇمىس، مال بەرۋگە ۋادە ەتتى

ول ءتىپتى اۋىلعا كوشىپ كەلەتىندەرگە باسپانا مەن مال، جۇمىس ورىندارىن ۇسىنۋعا ۋادە بەردى. ەر ادام وسى ارەكەتىمەن شاعىن اۋىلدى ساقتاپ قالۋعا تىرىسىپ ءجۇر، - دەپ حابارلايدى «حابار 24».

تەلەارنا مالىمەتىنشە، حرومتاۋ اۋدانىنداعى قارلاۋ اۋىلىندا 150 تۇرعىن بار. بۇل جۇماباي بەكماعامبەتوۆتىڭ تۋىپ- وسكەن جەرى. ول وسىندا وتباسىن قۇرىپ، سۇيىكتى ءىسىن دامىتقان. بىلتىر ول ءوز قاراجاتىنا باستاۋىش مەكتەپ سالىپ، جەتكىلىكتى تۇردە مۇعالىمدەردى جۇمىسقا العان. دەگەنمەن، 40 ورىنعا ەسەپتەلگەن ءبىلىم وشاعىندا 13 بالا عانا ءبىلىم الىپ جاتىر ەكەن.

مەكتەپ ديرەكتورى الماگۇل بەكماعامبەتوۆانىڭ ايتۋىنشا، وقيمىن دەۋشىلەردى مەكتەپ قابىلداۋعا دايىن. ديرەكتور بالا سانى كوپ بولسا، ءبىلىم بايگەسىندە باسەكەلەستىكتىڭ دە كۇشەيە تۇسەتىنىن العا تارتادى.

«وقيمىن دەۋشىلەرگە ورىن جەتكىلىكتى. بالالار سانى كوپ بولسا، سالاۋاتتى باسەكەلەستىك جاعدايىندا تالاسا وقىپ، ارالاساتىن ەدى. بىزدە بارلىق جاعداي جاسالعان»، - دەدى ديرەكتور.

شارۋا قوجالىعىنىڭ باسشىسى جۇماباي بەكماعامبەتوۆتىڭ ءوزى ەڭبەككە جارامدى ەرلەردى سۇرانىسقا يە ماماندىقتار بويىنشا وقىتىپ، تۇراقتى تابىسپەن قامتاماسىز ەتۋگە دايىن ەكەنىن ايتادى.

«باستى ماقساتىم - وسى اۋىلىم قارلاۋدى جويىلىپ كەتۋدەن ساقتاۋ. ويتكەنى بولاشاعى بار مەكەن. قالادا پاتەردەن پاتەرگە كوشىپ، قينالعانشا بىزگە كەلۋگە شاقىرامىن. العاش تىلەك ءبىلدىرىپ، كەلگەندەرگە بوس ءۇي الىپ بەرۋگە دايىنمىن. ءوز اتىمنان سيىر مەن 10 باس قوي بەرەمىن. ال كەلەسى جىلى ءۇي سالۋدى قولعا الماقپىن»، - دەدى جۇماباي بەكماعامبەتوۆ.