سەمەيلىك وقۋشىلار اباي ءوڭىرى تاريحي- مادەني مۇراسىنىڭ ينتەراكتيۆتى كارتاسىن ازىرلەدى
ولار بولاشاقتا كارتانى ينتەرنەتسىز پايدالانۋعا بولاتىن سايتقا اينالدىرماق، دەپ حابارلايدى قازاقپارات.
اتالعان كارتا ارقىلى ساياحاتشىلار قاسيەتتى ولكەنىڭ تاريحي ورىندارى تۋرالى 3 تىلدە اقپارات الا الادى.
ينتەراكتيۆتى كارتانى ازىرلەگەن سەمەي قالاسىنداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ 9-سىنىپ وقۋشىلارى ميراس ايتبەك پەن دانيال مولدىبەكوۆ اۆتورلىق قۇقىققا يە بولدى.
«كارتامىز ازىرگە ماكەت تۇرىندە جاسالدى. دەگەنمەن، ساياحاتشىعا قاجەتتى اقپاراتتىڭ بارلىعىن قامتىدىق دەپ ايتا الامىن. نەگە دەسەڭىز، سەمەي- قاراۋىل كۇرە جولىنان باستاۋ الاتىن كارتا مارشرۋتى كۇشىكباي اسۋىنان بورىلىدەگى م. اۋەزوۆ مۇراجاي- ءۇيى، قاسقابۇلاق، ويقۇدىق، ەڭلىك- كەبەك ۇڭگىرى، ەرالى جازىعى، ايگەرىم قىستاۋى، جيدەبايداعى مەموريالدى كەشەنگە دەيىنگى تاريحي- مادەني ورىندار جايلى مول ماعلۇمات بەرەدى. ءبىزدىڭ كارتامىزدىڭ ارتىقشىلىعى - ساياحاتشىعا ىڭعايلى بولۋ ءۇشىن قازاق، ورىس، اعىلشىن تىلدەرىندە اقپاراتتار جۇكتەلدى. ال، وسى اقپاراتتاردى وقىماي، تىڭداعىسى كەلەتىندەر ءۇشىن اۋديو جازبا ەنگىزدىك. دەمەك، وزىنە كەرەكتى اقپاراتتى ءارتۇرلى الەۋمەتتىك جەلىدەن ىزدەۋدىڭ قاجەتى جوق. بارلىعى ءبىر جەرگە توپتاستىرىلعان كارتانى پايدالانسا بولعانى»، - دەيدى ميراس ايتبەك.
وقۋشىلار بولاشاقتا كارتا ماكەتىن تولىققاندى سايتقا اينالدىرىپ، ونىڭ ينتەرنەتسىز جۇمىس ىستەۋىنە جاعداي تۋدىرۋدى ماقسات ەتىپ وتىر.