قايرات قۇدايبەرگەن مەن «ديكي ارمانعا» راقىمشىلىق جاسالا ما - باس پروكۋراتۋرا جاۋابى

بۇل تۋرالى باس پروكۋروردىڭ ورىنباسارى اسەت شىنداليەۆ ايتتى، دەپ حابارلايدى قازاقپارات ءتىلشىسى.

بۇگىن سەناتتا وتكەن باسپا ءسوز ءماسليحاتىندا تىلشىلەر باس پروكۋروردىڭ ورىنباسارىنان قاڭتار وقيعاسىن ۇيىمداستىرۋشىلار ساناتىنا كىمدەر جاتاتىنىن، سونداي-اق قايرات قۇدايبەرگەن (كاسىپكەر) مەن «ديكي ارمان» لاقاپ اتىمەن تانىمال ارمان جۇماگەلديەۆتىڭ وسى ساناتقا قاتىستىلىعىن سۇرادى.

«بىزدە جالپى 20 شاقتى ادامنىڭ ارەكەتى (قاڭتار وقيعاسى كەزىندە) جاپپاي تارتىپسىزدىكتى ۇيىمداستىرۋشى رەتىندە قىلمىستارى سارالانعان. ولارعا راقىمشىلىق جاسالمايدى، تەك قاتىسۋشىلار راقىمشىلىققا ىلىگەدى.

قاڭتار وقيعاسىندا قىلمىس جاساعانداردىڭ باسىم بولىگى قاتىسۋشىلار بولىپ سانالادى. ولاردىڭ سانى شامامەن 700 ادام. ولاردىڭ بارىنە راقىمشىلىق جاسالادى، ال جاپپايى تارتىپسىزدىك ۇيىمداستىرعان 20 ادام راقىمشىلىققا ىلىنبەيدى»، - دەدى اسەت شىنداليەۆ.

وسى ورايدا ول قايرات قۇدايبەرگەنگە ۇيىمداستىرۋشى ايىبى تاعىلعانىن ناقتىلادى.

بۇدان بۇرىن حابارلانعانداي، قايرات قۇدايبەرگەن الماتى وقيعاسى كەزىندە جاپپاي تارتىپسىزدىكتەردى ۇيىمداستىردى جانە وعان قاتىستى دەگەن كۇدىكپەن ۇستالدى.

ال 7-قاڭتاردا الماتىدا پوليتسەيلەر «ديكي ارمان» لاقاپ اتىمەن تانىمال قىلمىس الەمىنىڭ سەركەسى ارمان جۇماگەلديەۆتى ۇستادى.