قاڭتار وقيعاسى: ەرتەڭ سەناتتا راقىمشىلىق تۋرالى زاڭ جوباسى قارالادى
سەنات ءتوراعاسى ماۋلەن اشىمبايەۆ پرەزيدەنتتىڭ قاڭتار وقيعاسىنا قاتىسۋشىلارعا راقىمشىلىق جاساۋ تۋرالى باستاماسى گۋمانيزمنىڭ جانە ىزگىلىكتىڭ جارقىن كورىنىسى ەكەنىن اتاپ ءوتتى.
«مەملەكەت باسشىسى ءوز جولداۋىندا قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋدى تاپسىردى. سوعان بايلانىستى ءبىر توپ پارلامەنت دەپۋتاتى ءتيىستى زاڭ جوباسىنا باستاماشىلىق جاسادى. الداعى ۋاقىتتا قاجەتتى جۇمىستاردى اتقارىپ، قورىتىندىلارىن الىپ، اتالعان زاڭدى بارىنشا تەزىرەك قابىلداۋىمىز كەرەك»، - دەدى ماۋلەن اشىمبايەۆ.
«راقىمشىلىق جاساۋ تۋرالى» زاڭ جوباسىنىڭ نورمالارى قىلمىستىق تەرىس قىلىقتار، ونشا اۋىر ەمەس جانە اۋىرلىعى ورتاشا قىلمىستار جاساعانداردى جازادان بوساتۋدى كوزدەيدى. مۇنداي قىلمىستار ءۇشىن جازاسىن وتەگەندەردەن سوتتىلىعى الىنادى. زاڭ جوباسى ارقىلى اۋىر قىلمىس جاساعاندار ءۇشىن سوت تاعايىنداعان جازا تورتتەن ۇشكە، ال اسا اۋىر قىلمىستار ءۇشىن جارتىسىنا قىسقارتىلادى.
سونداي-اق، زاڭ جوباسىندا بوساتىلاتىن ادامداردى جۇمىسقا ورنالاستىرۋدى، ولارعا مەديتسينالىق كومەك كورسەتۋدى جانە قۇجاتتارىن رەسىمدەۋدى كوزدەيتىن، ياعني قايتا الەۋمەتتەندىرۋدى قامتاماسىز ەتەتىن نورمالار بار. ايتا كەتۋ كەرەك، ازاپتاۋلار جاساعاندار، تەرروريستەر، ەكسترەميستەر، رەتسيديۆيستەر جانە تارتىپسىزدىكتەردى ۇيىمداستىرۋشىلار راقىمشىلىققا جاتپايدى.
ايتا كەتسەك، اتالعان زاڭ جوباسى ءماجىلىستىڭ جالپى وتىرىسىندا ماقۇلدانعان بولاتىن.
سونىمەن قاتار، ەرتەڭگى وتىرىستا «ەۋرازيالىق ەكونوميكالىق وداقتىڭ تەحنيكالىق رەگلامەنتتەرى تالاپتارىنىڭ ساقتالۋىنا مەملەكەتتىك باقىلاۋدى (قاداعالاۋدى) ەۋرازيالىق ەكونوميكالىق وداققا مۇشە مەملەكەتتەردىڭ كورسەتىلگەن سالاداعى زاڭناماسىن ۇيلەستىرۋ ماقساتىندا جۇزەگە اسىرۋ قاعيداتتارى مەن تاسىلدەرى تۋرالى كەلىسىمدى راتيفيكاتسيالاۋ تۋرالى» زاڭ جوباسى دا قارالادى. بۇل قۇجات اتالعان سالادا مۇشە مەملەكەتتەردىڭ زاڭناماسىن ۇيلەستىرەدى. كەلىسىمدە قاۋىپتى ءونىم تۋرالى اقپاراتتاندىرۋ جۇيەسىنىڭ جۇمىسىن قامتاماسىز ەتۋ قاراستىرىلعان. سول ارقىلى ە ا ە و- نىڭ تەحنيكالىق رەگلامەنتتەرىنىڭ تالاپتارىنا سايكەس كەلمەيتىن ءونىم تۋرالى مالىمەتتەر الماسۋ جۇرگىزىلەدى.
