تيكتوك قوسىمشاسى قازاق تىلىنە اۋدارىلادى

بۇل تۋرالى شىعىس ەۋروپاداعى TikTok Global Business Solutions ديرەكتورى جانە TikTok Kazakhstan كومپانياسىنىڭ بولاشاق باسشىسى اناستاسيا پانينا ايتتى، دەپ حابارلايدى قازاقپارات ءتىلشىسى.

«قازاقستانداعى اۋديتوريا شىعارماشىلىققا بەيىم جانە ادامدار ءوز ۇندەۋلەرىن جەتكىزۋ ءۇشىن وسى پلاتفورمانى پايدالانادى. مۇندا جاڭا كونتەنت جاسايتىن كوپتەگەن مۋزىكانتتاردى، مۇعالىمدەردى، جاس انالاردى كورىپ وتىرمىز. ءبىز پلاتفورما رەتىندە قاۋىمداستىققا جاقىن بولعىمىز كەلەدى، سوندىقتان وسى كۇزدە قازاقستاندا وكىلدىك اشامىز. ءبىز ءبىلىم بەرۋ ۇيىمدارىمەن، مەملەكەتپەن كوبىرەك جوبالار شىعارعىمىز كەلەدى، پلاتفورمانىڭ كونتەنتىن بارىنشا قىزىقتى ءارى پايدالى ەتەمىز»، - دەدى اناستاسيا پانينا Astana Media Week مەديافورۋمىندا تىلشىلەرگە بەرگەن سۇحباتىندا.

سونىمەن بىرگە ا. پانينا قوسىمشانىڭ قازاق تىلىنە اۋدارىلاتىنىن راستادى جانە TikTok-تى ءبىلىم بەرۋ ماقساتىندا كرەاتيۆتى پايدالانۋ مىسالدارىن كەلتىردى.

«بىزدە كرەاتورلاردى دامىتۋ باعدارلاماسى بار، وندا ءبىز قانداي اۆتورلاردىڭ اۋديتوريانى قىزىقتىراتىنىن قاراستىرامىز جانە ولارعا پلاتفورمانىڭ بارلىق قۇرالدارىمەن تانىسۋعا مۇمكىندىك بەرەمىز. ءبىز ءبىلىم بەرۋ باعدارلامالارىن جاڭا دەڭگەيگە كوتەرۋگە كومەكتەسەمىز. مىسالى، حيميا ءپانىنىڭ مۇعالىمى ۇلان ۇسەنوۆ حيميا تۋرالى اڭگىمەلەيتىن بەينەروليكتەر جاسايدى، ەكسپەريمەنتتەر جۇرگىزەدى، مۋزىكا قويادى. بۇل كوپتەگەن مۇعالىمدەر ءۇشىن شىنىمەن شابىتتاندىرارلىق. TikTok قازاقستاندا وتە تانىمال، ويتكەنى اۋديتورياسى وتە كرەاتيۆتى»، - دەدى اناستاسيا پانينا.

ايتا كەتەيىك، اتالعان جوبا 26-28 - قازان كۇندەرى وتەدى. وندا 150 وتاندىق جانە حالىقارالىق سپيكەرلەردىڭ قاتىسۋىمەن 30 دان استام ءىس-شارا وتەدى.