زاۋرەن قۇسبەك. باسىمدى جوعالتىپ الدىم
انەەەۋ ءبىر جىلى، قاپ-قارا شاشىم ماڭدايىمدى جاۋىپ ومىرگە كەلە قالعانىمدا جىلاپ جىبەرگەم قۋانعاننان. ءما،ءومىر قانداي تاماشا، قانداي جاپ-جارىق... تۇيىلگەن الاقانىممەن، تارىس جۇمىلعان كوزىمدى اشپاي تۇرىپ سان ميليون تارام جولداردى كورىپ قويعام. انە، انە بىرەۋ جول، مەنىڭ جولىم. سول ءيىر-قىيىر جولداعى ءوزىمنىڭ ءالى باسپاعان ىزدەرىمدى دە ايقىن كورگەمىن. ءتۋۋ، قانداي عاجاپ دۇنيە مىناۋ دەپ، كوزىمدى اقىرىن سىعىرايتا اشقامىن.
ءبىر كۇنى اپىل-تاپىل اياعىمدى باستىم دا، ءوزىم الدە قاشان كورىپ قويعان جولىمنىڭ ۇستىندەگى ءوز ىزدەرىمدى باسا قويدىم. و، قانداي ءدال تۇسەدى. شاقايىمنىڭ رازىمەرى دە ءدال. نەشىنشى نومەرلى اياق كيىم ەدى اياعىمداعى...
سودان الگى باسىمداعى شاشتارىم يرەلەڭدەپ وسە باستادى. مەن دە يرەلەڭدەگەن جولدارىمدى شيرلاي باستادىم. ەكى يعىىم دومالاق باسىمدى كوتەرىپ ءجۇردى. باسىم شاشىمدى ءوسىرىپ الەك ءوز ۇستىنە، باسقالاي باسىمدا وزگەرس جوق ەدى وندا...
ءبىر كۇنى ەكى يىعىم دومالاق باسىمدى كوتەرىپ الىپ ادامدار اراسىنا سۇڭگىپ كەتتى. نەشە ءتۇرلى باستار قايشالىسىپ ءجۇرمىز. سۇيتسەم سان مييليون دومالاق باستار، باسىمىز سياقتى الىپ ءبىر دومالاقتىڭ ۇستىنە ءجۇر ەكەنبىز عوي. قاۋعاداي باسىم نەشە ءتۇرلى باستارعا جولىعىپ، يرەلەڭدەگەن جولداردى قاتار باستىق. قاراڭعىدا جولىنان اداسقان باستار، شارشاعان، بولدىرعان باستار...
مەندە ءبىر كۇنى بولدىرا قالدىم. يرەلەڭدەگەن ءوز جولىم ۇزاق جاتىر الدىمدا. ارىپ- شارشاپ كەلىپ جول جاعاسىنا وتىرا قالىپ ماڭدايىمداعى تەرىمدى سۇرتەيىن دەپ، قولىمدى باسىما اپارا بەرىپ اۋانى قارماپ، ايقايلاپ جىبەردىم ...
- و .توبا، باسىم قايدا مەنىڭ، باسىم جوق قوي، قاۋعاداي باسىم قايدا، ويباي، باسسىز قالاي جۇرگەنمىن.
شىڭعىرىپ جىبەردىم تاعى دا. داۋسىم قايدان شىعىپ جاتقانىن بىلمەيمىن. وسى ساتتە كەۋدە تۇسىمنان كۇرسىنگەن ءبىر داۋىس ەستىلدى.
- بالام، بۇل مەن عوي، جۇرەگىڭمىن عوي...
مەن جىلاپ جىبەردىم، باسى جوق جىلاعان ادامدى كورگەندەرىڭىز بارما؟!
- بالام دەيسىڭ بە، قالاي مەن سەنىڭ بالاڭ بولامىن،-دەدىم جۇرەگىمە.
باسسىز سويلەپ وتىرعانىم وزىمە وتە قىزىق سەزىلدى. قورقىنشىم بۇل ساتتە باسىلعان-تۇعىن.
جۇرەگىم سونداي ءبىر جاعىمدى اۋەزبەن سويلەي باستادى:
- بالام مەن سەنىمەن بىرگە كەلدىم ومىرگە، سەنىڭ باسقان شيىر جولدارىڭدا بىرگە بولدىم. مەن جانتايىپ جاتىپ ءبارىن كورىپ جاتتىم. ءاردايىم باسىڭ الدا ءجۇردى دە، مەن تەك ءۇنسىز قالدىم... سەن مەنى ەلەمەدىڭ، ءمان بەرمەدىڭ.
- بالام، قىم-قۋىت جولداردا نەشە ءتۇرلى باستارمەن بىرگە بولدىڭ، كەي جولىققان باستارعا باسىڭدى جاپىراقتاپ ۇلەسترە بەردىڭ، سول كەزدە مەن قاتتى اۋىردىم. ءبىر كۇنى بىلەر دەدىم.
- مەن قارتايمادىم، قارتايمايمىن دا... ءبىراق سەنىڭ باسىڭنىڭ كورگەندەرىن بىرگە كورە بەرىپ، كوپ ويعا كەتە بەرىپ، باسىڭنان بۇرىن ەسەيىپ كەتتىم. مىنە قازىر باسىڭدى جوعالتىپ قايعىرىپ وتىرسىڭ، قايعىرۋ دا مەنىڭ جۇمىسىم بىلسەڭ. ال مەن قازىرشە قايعىرمايمىن، باسىڭنىڭ جوق ەكەنىن بىلگەنىڭنىڭ ءوزى مەنى قۋانتىپ وتىر.
سەن الاڭداما، قالىڭ باستاردىڭ اراسىنا بار دا، ءوزىڭ جاپىراقتاپ ۇلەستىرىپ كەتكەن باسىڭنىڭ قيىقتارىن جيىپ اكەل. ەسڭدە بولسىن ولاردى قايتارىپ العاندا قاعىپ-سىلكىپ، شاڭ-توزاڭىن سۇرتىپ ال، -دەدى.
ۇھ، وسى اراعا كەلگەندە جىميىپ كۇلگەنىمدى ءوزىم دە بىلمەيمىن. باسىىز دەنەممەن قالاي جىميعانىمدى دا سىزدەرگە ايتىپ بەرە المايمىن.
سودان باسسىز دەنەممەن باسى بار ادامداردىڭ اراسىنا سۇڭگىپ كەتتىم... ايتەۋىر جاپىراقتاپ ۇلەسىترگەن باسىمدى جيناپ بولعانشا ءتۇننىڭ ءبىر ۋاعى بولدى. تاڭعا جاقىنداعاندا عانا باسىمدى بۇتىندەپ الدىم-اۋ... بۇرىنعىداي ەمەس جەپ-جەڭىلمىن، پارشالانعان باسىمدى قاعىپ-سىلكىپ العانىمنىڭ پايداسى ءتيدى. جۇرەگىم الدامايدى عوي مەنى.
ءسال بولدىرعانداي بولعاسىن كوزىم ءىلىنىپ ۇيقتاپ كەتىپپىن. بۇل جولى باسى بار دەنەممەن راحاتتانا ۇيىقتادىم. ءبىر كەزدە سبىرلاپ سويلەسكەن داۋىستاردان ويانىپ كەتتىم. اقىرىن تىڭداسام، باسىم مەن جۇرەگىم سويلەسىپ جاتىر ەكەن.
- اقىماق، - دەپ قويادى جۇرەگىم باسىما. - ەكەۋمىز ايرىلماس دوس ەدىك قوي ءاۋ باستا، سەرتىڭدى ۇمىتتىڭ، ەندى اداسىپ جوعالىپ كەتپە،- دەپ جاتىر.
كوزىمنەن جاس شىعىپ كەتتى ەرىكسىز. بۇل جولى باسى بار دەنەممەن شىن جىلادىم.
- مەنىڭ قاۋعاداي باسىم-اۋ، سەنى قالاي بولشەكتەگەنمىن، جوعالتىپ تاۋىپ العانىم قانداي جاقسى سەنى، - دەپ قوبىراعان بۇيرا-بۇيرا قالىڭ شاش وسكەن اداسقان باسىمدى سيپاپ قويدىم.
مەن باسىمدى تاۋىپ الدىم.
اۆتور: زاۋرەن قۇسبەك
P.S
زاۋرەن قۇسبەك - قىتايداعى بەلگىلى قازاق جازۋشىسى باتىرحان قۇسبەگيننىڭ قىزى. ءبىز زاۋرەننىڭ بۇل تۋىندىسىن «Wechat» الەۋمەتتىك جەلىسىندەگى جەكە پاراقشاسىنان الدىق.
