رەسپۋبليكا كۇنى: ەلوردادا الامان بايگە ءوتتى - فوتو

استانا. قازاقپارات - استانادا ۇلتتىق مەرەكەگە ورايلاستىرىلعان الامان جانە توپ بايگە ءوتتى.

وعان ەلىمىزدىڭ ءار قالاسى مەن وڭىرىنەن كەلگەن شاباندوزدار قاتىستى، دەپ حابارلايدى قازاقپارات ءتىلشىسى.

جارىس استانا ماڭىندا ورنالاسقان «ەتنواۋىل» ۇلتتىق-مادەني كەشەنىندە ءوتتى. ونى تاماشالاۋعا كەلگەن حالىق قاراسى كوپ بولدى.

«جارىستىڭ باستى ماقساتى - ۇلتتىق جانە وليمپيادالىق سپورت تۇرلەرىن كەڭىنەن ناسيحاتتاۋ، كەلەشەگى زور شاباندوزدار مەن جىلقىلاردى انىقتاۋ. سايىستى استانا قالاسىنىڭ ۇلتتىق جانە وليمپيادالىق ات سپورتى تۇرلەرىنىڭ فەدەراتسياسى، قالالىق «دەنە شىنىقتىرۋ جانە سپورت باسقارماسى»، استانا قالاسى اكىمدىگى بىرلەسىپ ۇيىمداستىرىپ وتىر»، - دەدى استانا قالالىق دەنە شىنىقتىرۋ جانە سپورت باسقارماسىنىڭ باسپا ءسوز حاتشىسى مادينا ايتقاليەۆا.

كەلۋشىلەردىڭ پىكىرىنشە، توپ جانە الامان بايگە تارتىستى ءوتتى. شاباندوزدار كىشى بايگەدە – 14، الاماندا - 20 شاقىرىم قاشىقتىقتا باق سىناستى. توپ بايگەگە ەلىمىزدىڭ تۇكپىر- تۇكپىرىنەن كەلگەن 19 شاباندوز قاتىستى. ال الاماندا 30-عا جۋىق قاتىسۋشى ءوزارا كىم مىقتىنى انىقتادى.

جارىستىڭ قورىتىندىسىنا سايكەس، توپ بايگەدە الماتى وبلىسىنىڭ نامىسىن قورعاعان ابزال تۇرعامبەك (سايىس اتى «ۆەليكي») مارەگە ءبىرىنشى كەلدى. ەكىنشى ورىندى قوستانايلىق نۇراسىل احمەتوۆ (سايىس اتى «باقتورى»)، ءۇشىنشى ورىن اقمولا وبلىسىنان كەلگەن نۇرتىلەۋ ىرىمحان (سايىس اتى «بارسا») يەلەندى.

الامان بايگەنىڭ باس جۇلدەسىن «ايبار» لاقاپ اتىمەن جىلقىسىن ەرتتەگەن الماتى وبلىسىنىڭ شاباندوزى ارنات مۇراتحان جەڭىپ الدى. ەكىنشى ورىن پاۆلودارلىق اسحات راقىمجانوۆقا (سايىس اتى «چەرۆونەتس») بۇيىرسا، ۇزدىك ۇشتىكتى تۇركىستان وبلىسىنىڭ شاباندوزى ارنۇر سامات ۇلى (سايىس اتى «بوتاگوز») قورىتىندىلادى.

بارلىق جەڭىمپازدار مەن جۇلدەگەرلەر اقشالاي سىيلىقتارمەن ماراپاتتالدى. قوسا كەتسەك، بايگەنىڭ جۇلدە قورى 17 ميلليون تەڭگە.