جەكە ۇلتتىق عارىش اگەنتتىگى قۇرىلا ما
استانا. قازاقپارات – ق ر پرەمەر- ءمينيسترىنىڭ ءبىرىنشى ورىنباسارى رومان سكليار ءماجىلىس دەپۋتاتىنىڭ جەكە ۇلتتىق عارىش اگەنتتىگىن قۇرۋعا قاتىستى ساۋالىنا جاۋاپ بەردى، دەپ حابارلايدى قازاقپارات ءتىلشىسى.
«قازىرگى ۋاقىتتا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە عارىش سالاسىندا باسشىلىقتى جۇزەگە اسىرۋ جانە سالاارالىق ۇيلەستىرۋ بولىگىندە قويىلعان مىندەتتەردى ىسكە اسىرۋ ءۇشىن جەتكىلىكتى وكىلەتتىكتەر بەرىلگەن. بۇعان قوسا، عارىش سالاسىن سيفرلاندىرۋ، بايلانىس، ەلەكتروندى ونەركاسىپ، گەودەزيا جانە كارتوگرافيامەن ءبىر مەملەكەتتىك ورگانعا بىرىكتىرۋ وڭ سينەرگەتيكالىق اسەرگە يە. ماسەلەن، عارىش سالاسىنىڭ ونىمدەرى مەن قىزمەتتەرى (عارىشتىق سۋرەتتەر مەن جقز دەرەكتەرى) ارتىق بيۋروكراتياسىز ءبىرىن- ءبىرى تولىقتىراتىن باعىتتاردا بەلسەندى پايدالانىلادى»، - دەدى رومان سكليار.
سونداي- اق ونىڭ ايتۋىنشا، ۋاكىلەتتى ورگاننىڭ جانىنان عىلىمي- زەرتتەۋ بازاسىن قۇرۋ ءۇشىن ۇكىمەت ۆ. فەسەنكوۆ اتىنداعى استروفيزيكالىق ينستيتۋتتى، يونوسفەرا جانە عارىش تەحنيكاسى مەن تەحنولوگيالارى ينستيتۋتتارىن تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ قاراماعىنا بەرۋ تۋرالى شەشىم قابىلدادى.
2030 -جىلعا دەيىنگى مەملەكەتتىك باسقارۋ تۇجىرىمداماسىندا (مەملەكەت باسشىسىنىڭ 26.02.2021 -جىلعى № 522 جارلىعى) مەملەكەتتىك اپپاراتتى ودان ءارى وڭتايلاندىرۋ كوزدەلگەنىن ەسكەرە وتىرىپ، جەكە ۇلتتىق عارىش اگەنتتىگىن قۇرۋ قازىرگى ۋاقىتتا ءتيىمسىز دەپ سانايمىز»، - دەدى ول.
