سىمسىز قۇلاققاپتار مەن باسقا دا گادجەتتەر قاتەرلى ىسىك تۋدىرا ما

مۇنداي قۇرىلعىلار قاتەرلى ىسىك اۋرۋىن تۋدىراتىندىقتان ەكى جۇزدەن استام عالىم ولاردى قولدانۋعا قارسى پەتيتسياعا قول قويعان- مىس.

Stopfake.kz سايتىنىڭ جازۋىنشا، بۇل اقپاراتتار - جالعان، دەپ حابارلايدى قازاقپارات.

«سىمسىز قۇلاققاپتار قۇلاققا ەنىپ، ميدى «ساۋلەلەندىرەتىندىكتەن» ونكولوگيالىق سىرقات تۋدىرادى دەگەن قاۋەسەت جەلىدە 2019 -جىلى تاراعان بولاتىن. ءبىراق ول كەزدە پايدالانۋشىلار پەتيتسياعا قازىرگىدەي 250 ەمەس، 200 عالىم قول قويدى دەپ ايتقان ەدى. شىندىعىندا، عالىمدار سىمسىز گادجەتتەرگە تىيىم سالۋ تۋرالى پەتيتسياعا مۇلدەم قول قويماعان. تاراتىلعان حابارلامادا عالىمدار توبىنىڭ ادامدارعا ارنالعان ۇيالى تەلەفوندار مەن سىمسىز قۇرىلعىلاردان كەلەتىن يونداۋشى ەمەس ساۋلەلەنۋدىڭ قاۋىپسىزدىگىن مۇقيات زەرتتەۋ تۋرالى وتىنىشتەرى جايلى ايتىلدى. ماتىندە ولاردى پايدالانۋعا تىيىم سالۋ تۋرالى ءسوز جوق»، - دەلىنگەن سايتتا.

ونىمەن ءبىر مەزگىلدە، ءمالىم ەتىلگەندەي، ءارتۇرلى ەلدەردىڭ زەرتتەۋشىلەرى سىمسىز قۇرىلعىلاردىڭ، اسىرەسە قۇلاققاپتاردىڭ ادامدار ءۇشىن قاۋىپتى، نە قاۋىپسىز ەكەنىن انىقتاۋ ماقساتىندا تاجىريبەلەردى شىنىمەن جۇرگىزگەن. امەريكا ونكولوگيا قوعامىنىڭ مالىمەتىنشە، سىمسىز قۇلاققاپتار جۇمىس ىستەيتىن Bluetooth-دان ۇيالى تەلەفونعا قاراعاندا الدەقايدا از راديوتولقىن تارالادى.

«2019 -جىلى جۇرگىزىلگەن زەرتتەۋ سىمسىز قۇلاققاپتاردان تارالاتىن ساۋلە كۇشى ۇيالى تەلەفونعا قاراعاندا 10-400 ەسە ءالسىز ەكەنىن دالەلدەدى.

ا ق ش-تىڭ ازىق-تۇلىك جانە ءدارى- دارمەك ساپاسىن سانيتارلىق قاداعالاۋ باسقارماسىنىڭ سايتىندا 1999 -جىلى ۇيالى تەلەفونداردىڭ جاپپاي تارالا باستاعاننان قازىرگى ۋاقىتقا دەيىن مي ىسىگى اۋرۋلارىنىڭ سانى وسپەگەنى تۋرالى اقپارات بار. كەرىسىنشە، بۇل كورسەتكىش، جىل سايىن شامامەن % 0,2 تومەندەپ كەلەدى.

قورىتا ايتقاندا، ۇيالى تەلەفونداردى پايدالانۋ قاتەرلى ىسىك اۋرۋلارىنا شالدىعۋ قاۋپىن ارتتىرمايدى. ياعني، الدەقايدا ءالسىز ساۋلە تاراتاتىن قۇلاققاپتار بۇل قاۋىپتى ارتتىرا المايتىنى تۇسىنىكتى.

بۇل ماسەلەنى زەرتتەگەن عالىمدار قاتەرلى ىسىك پەن سىمسىز گادجەتتەردى پايدالانۋدىڭ اراسىنداعى بايلانىستىڭ ناقتى دالەلىن تاپپادى.

دەمەك، تارالعان اقپارات ەسكى فەيكتىڭ قايتالانۋى بولىپ تابىلادى جانە بەلگىلەنگەن عىلىمي فاكتىلەرگە قايشى كەلەدى»، - دەپ تۇيىندەيدى Stopfake.kz.