تبيليسيدە «ترانسكاسپي حالىقارالىق كولىك باعدارىنىڭ» كەزەكتى جالپى جينالىسى ءوتتى

وتىرىسقا قازاقستان، گرۋزيا، تۇركيا جانە ازەربايجان تەمىرجول اكىمشىلىكتەرىنىڭ، كەمە قاتىناسى كومپانيالارى مەن پورتتارىنىڭ باسشىلارى قاتىستى. گرۋزيانىڭ ۆيتسە-پرەمەر-ءمينيسترى، ەكونوميكا جانە تۇراقتى دامۋ ءمينيسترى ليەۆان داۆيتاشۆيلي قۇتتىقتاۋ ءسوز سويلەدى.

وتىرىسقا قاتىسۋشىلار قاۋىمداستىقتىڭ جۇمىسى تۋرالى ەسەپتى تىڭداپ، مارشرۋتتاعى تاسىمالداردىڭ جالپى وڭ قارقىنىن جانە ەۋروپا، ورتالىق ازيا مەن قىتاي اراسىنداعى ترانزيتتىك اعىنداردى قامتاماسىز ەتۋدەگى ارتىپ كەلە جاتقان ءرولىن اتاپ كورسەتتى.

قاۋىمداستىق مۇشەلەرىنىڭ جالپى كۇش-جىگەرى ارقاسىندا 2022-جىلدىڭ 9 ايىندا ت ح ك ب باعىتى بويىنشا جۇكتەردى تاسىمالداۋ كولەمى وتكەن جىلدىڭ سايكەس كەزەڭىمەن سالىستىرعاندا 2,7 ەسەگە ارتىپ، 1 ميلليون 84 مىڭ توننانى قۇراعانى اتاپ ءوتىلدى.

ءوسىمنىڭ ۇلكەن ۇلەسى ەكسپورتقا كەلەدى. باعدار بويىنشا قازاقستاننان ەكسپورتتىق تاسىمالداۋ كولەمى 7,9 ەسەگە ارتىپ وتىر.

قاتىسۋشىلارمەن ورتا ءدالىز بويىنشا كونتەينەرلىك تاسىمالدار كولەمىنىڭ ودان ءارى ءوسىمىن قامتاماسىز ەتۋ جانە مارشرۋتتا قولايلى جاعدايلار جاساۋ ءۇشىن ءبىرقاتار شارالار ازىرلەندى.

ايتا كەتەيىك، ترانسكاسپي حالىقارالىق كولىك باعدارى (ت ح ك ب) قازاقستان، قىتاي، كاسپي تەڭىزىنىڭ اكۆاتورياسى، ازەربايجان، گرۋزيا، تۇركيا جانە قارا تەڭىز ارقىلى ءارى قاراي ەۋروپا ەلدەرىنە وتەدى. «ت ح ك ب» قاۋىمداستىعىنىڭ مۇشەلەرى - 20 كومپانيا، ونىڭ ىشىندە 8 ەلدىڭ تەمىرجول اكىمشىلىگىن قوسقاندا پورتتار، كەمە قاتىناسى جانە لوگيستيكالىق كومپانيالار بار.