يرانعا قارسى سانكتسيالار قابىلداندى

بۇل رەسەيدى وسى ۇشقىشسىز قۇرىلعىلارمەن قامتىعانى ءۇشىن قابىلدانعان شارا، دەپ حابارلايدى. ەۋرووداق وكىلدەرىنىڭ مالىمدەۋىنشە، رەسەي اسكەرى دروندارمەن ۋكراينانىڭ ازاماتتىق ينفراقۇرىلىمىنا، ياعني ەنەرگەتيكا نىساندارىنا شابۋىلدار جاساپ ءجۇر. ءبىراق يران جاعى دا، رەسەي تاراپى دا مۇنى جوققا شىعاردى.

نابيلا ماسراللي، ەۋروپالىق سىرتقى قاتىناستار قىزمەتىنىڭ رەسمي وكىلى:

- وداققا مۇشە ەلدەر شۇعىل قيمىل جاساۋىمىز كەرەك دەپ ساياسي كەلىسىمگە كەلدى. ەندى جەتكىلىكتى دالەل جيناعاننان كەيىن، ەۋرووداق كەڭەسى ناقتى ءارى جەدەل جاۋاپ بەرۋ ءىسىن قولعا الادى. ال يران اسكەريلەرى رەسەيدىڭ ۋكرايناعا قارسى وپەراتسياسىنا كومەك بەرۋ ءۇشىن قىرىمعا بارعان. مۇنى ا ق ش اكىمشىلىگىنىڭ وكىلدەرى مالىمدەدى. ولار رەسەي جاۋىنگەرلەرىن ءوز دروندارىن باسقارۋعا ۇيرەتكەن كورىنەدى. ناتو ۇيىمى دا دروندارمەن جابدىقتاعانىنا سەنىمدى. ۇيىم باسشىسى يەنس ستولتەنبەرگ رەسمي تەگەرانعا ۇندەۋ جاسادى.

يەنس ستولتەنبەرگ، ناتو باس حاتشىسى:

- يران رەسەيدى وسى ۇشقىشسىز اپاراتتارمەن قامتىعانىنا كۇمانىمىز جوق. ءبىز بارلىق ەلدەردى رەسەيدىڭ ۋكرايناعا قارسى قيمىلىنا قولداۋ كورسەتپەۋگە شاقىرامىز.

www.24.kz