الماتى اۋەجايىندا جولاۋشى سومكەسىندەگى زاريادتاۋ قۇرىلعىسى اتىلدى

الماتى. قازاقپارات - الماتى قالاسىنىڭ اۋەجايىندا جولاۋشىنىڭ ريۋكزاگىندا بولعان زاريادتاۋ قۇرىلعىسى اتىلدى، دەپ حابارلايدى قازاقپارات ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنە سىلتەمە جاساپ.

«19-قازان كۇنى حالىقارالىق رەيستەردىڭ ۇشۋ زالىندا تەكسەرۋ راسىمىنەن ءوتۋ كەزىندە ەير استانا اۋە كومپانياسىنىڭ «الماتى — بىشكەك» باعىتى بويىنشا ك س 109 رەيسىمەن ۇشپاق بولعان جولاۋشى ت. م. -نىڭ ءپورتاتيۆتى زاريادتاعىشى (Power bank) ورتەندى»، - دەلىنگەن مالىمەتتە.

وسى ورايدا «قازاقستاننىڭ اۆياتسيالىق اكىمشىلىگى» ا ق فورمالدىلىقتى وڭايلاتۋ دەپارتامەنتى قاجەت بولعان جاعدايدا كەڭەس الۋعا، راسىمىنەن ءوتۋ كەزىندە اۆياكومپانيا مەن اۋەجايلاردىڭ قىزمەتكەرلەرىن زاريادتاۋ قۇرىلعىلارىنىڭ بار ەكەندىگى تۋرالى حاباردار ەتۋگە قاتاڭ كەڭەس بەرەدى.

قاۋىپتى جۇكتەردى اۋەمەن قاۋىپسىز تاسىمالداۋ جونىندەگى يكاو- نىڭ DOC 9284 تەحنيكالىق نۇسقاۋلىعىنا سايكەس، قوسالقى باتارەيالار، سونىڭ ىشىندە قۋات كوزدەرى (Power bank) قول جۇگىمەن تاسىمالدانۋى كەرەك. سونداي- اق قىسقا تۇيىقتالۋدىڭ الدىن الۋ ءۇشىن ولار ءوزىنىڭ قاپتاماسىنا سالىنۋى كەرەك. نەمەسە ءار باتارەيانى بولەك پلاستيك پاكەتكە نەمەسە قورعانىس كورپۋسىنا سالۋ قاجەت.

«ەگەر ليتي باتارەيالارى (جابدىقتا، نە جابدىقپەن) جۇك رەتىندە تاسىمالداناتىن بولسا، وندا ولار يكاو تەحنيكالىق نۇسقاۋلىعىنىڭ قولدانىستاعى رەداكسياسىنا سايكەس ءتيىستى تۇردە دەكلاراتسيالانۋى، تاڭبالانۋى جانە بۋىپ- ءتۇيىلۋى ءتيىس.

ەستەرىڭىزگە سالا كەتەيىك، ۇشۋ قاۋىپسىزدىگى ءار جولاۋشىنىڭ جاۋاپكەرشىلىگىنە دە بايلانىستى»، - دەدى ازاماتتىق اۆياتسيا كوميتەتىنەن.