ءتورت كۇندىك جۇمىس اپتاسىنا كەزەڭ- كەزەڭىمەن كوشەمىز - كوميتەت

استانا. قازاقپارات – ق ر ەڭبەك جانە حالىقتى الەۋمەتتىك قورعاۋ مينيسترلىگىنە قاراستى ەڭبەك جانە الەۋمەتتىك قورعاۋ كوميتەتىنىڭ ءتوراعاسى تولەگەن وسپانقۇلوۆ ءتورت كۇندىك جۇمىس اپتاسىنا كوشۋ جونىندە پىكىر ءبىلدىردى، دەپ حابارلايدى قازاقپارات ءتىلشىسى.

ونىڭ ايتۋىنشا، 2015 -جىلدان باستاپ سول كەزدەگى پرەزيدەنت تاپسىرماسىمەن ەڭبەك قاتىناستارىن وڭتايلاندىرۋ جۇمىستارى جۇرگىزىلگەن.

«قازىرگى ۋاقىتتا ەلىمىزدىڭ ەڭبەك كودەكسىندەگى نورما بويىنشا 40 ساعاتتىق بەس كۇندىك نەمەسە التى كۇندىك جۇمىس اپتاسى مىندەتتى سانالادى. ءبىراق جۇمىس بەرۋشى ءوز قىزمەتكەرلەرىمەن كەلىسىپ، بۇل نورمانى تومەندەتە الادى. ءتورت كۇندىك جۇمىس اپتاسىنا كەلسەك، ءبىزدىڭ مينيسترلىك بۇل ماسەلەنى قاراستىرىپ جاتىر. بۇل كەزەڭ- كەزەڭىمەن جۇرگىزىلەدى. ماسەلەن، ءبىر ايدا ءتورت اپتا بولسا، ءبىرىنشى اپتادا ءتورت كۇن، ەكىنشى اپتادا - بەس كۇن، ءۇشىنشى اپتادا - التى كۇن جانە ءتورتىنشى اپتادا - تاعى ءتورت كۇن بولۋى مۇمكىن. ياعني «ەسەپ كەزەڭى» دەگەن ۇعىم بار، ساعاتتاردىڭ جالپى سانى وسى ەسەپ كەزەڭىنەن جوعارى بولماۋى كەرەك. ال قالعان ساتتەردى جۇمىس بەرۋشى قىزمەتكەرمەن ءوزارا شەشە الادى»، - دەدى ت. وسپانقۇلوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

بۇعان دەيىن ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا دا ءتورت كۇندىك جۇمىس اپتاسىنا كوشۋگە پىكىر بىلدىرگەن ەدى.