ەلوردادا رەسپۋبليكا كۇنىنە وراي قانداي ءىس-شارالار وتەدى

«بيىل مەملەكەت باسشىسى رەسپۋبليكا كۇنى مەرەكەسىن قايتا جاڭعىرتىپ، وعان «ۇلتتىق» مارتەبەسىن بەردى. ۇلتتىق مەرەكە تۇجىرىمداماسى اياسىندا قالالىق ءىس- شارالار جوسپارى بەكىتىلدى. رەسپۋبليكا كۇنىنە وراي قالادا 200 دەن استام ءتۇرلى فورماتتاعى شارا ۇيىمداستىرىلادى. ونىڭ جارتىسى ءوتتى. سونىمەن قاتار ءار اۋداندا ءتۇرلى سالادا قىزمەت ەتىپ، ەڭبەگى سىڭگەن ماماندار مەن ەرلىك جاساپ ەل ىقىلاسىنا بولەنگەن ازاماتتار ماراپاتتالادى»، - دەدى استانا قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ اكىمدىكتە وتكەن باسپا ءسوز ءماسليحاتىندا.

سونداي-اق، باسقارما باسشىسىنىڭ مالىمدەۋىنشە مەرەكە قارساڭىندا جاڭا تۇرعىن ۇيلەر، الەۋمەتتىك نىساندار جانە سپورتتىق كەشەندەر پايدالانۋعا بەرىلەدى.

«سول سياقتى دوڭگەلەك ۇستەل، دەبات، كورمە، تانىمال تۇلعالارمەن كەزدەسۋ جانە شىعارماشىلىق بايقاۋلار ۇيىمداستىرىلىپ جاتىر. ءىس-شارالاردىڭ قاتارىندا مەرەكەلىك كونتسەرت پەن جاس سۋرەتشىلەردىڭ كورمەسى دە بار»، - دەيدى ول.

ونىڭ ايتۋىنشا، بۇگىن ەلوردانىڭ بارلىق ءبىلىم مەكەمەلەرىندە رەسپۋبليكا كۇنى مەرەكەسىنە وراي سالتاناتتى شارا ءوتىپ جاتىر.

ودان بولەك، مەملەكەتتىك ءانۇراندى جاپپاي ورىنداۋ اكسياسى وتەدى.

مەرەكەس قارساڭىندا سپورتتىق شارالار دا ۇيىمداستىرىلماق.

اتاپ ايتقاندا، 24-25-قازاندا فۋتبول فەدەراتسياسى جانە تەننيس ورتالىعىمەن بىرلەسىپ بالالار اراسىندا جارىس وتكىزۋ جوسپارلانعان.

سونىمەن قاتار «ەتنواۋىل» ۇلتتىق-مادەني كەشەنىندە ات جارىستار وتەدى.

وسى كۇندەرى «قازانات» ات سپورتى كەشەنىندە بايگە وتەدى. الامان مەن توپ بايگەدەن جارىسقا ەلىمىزدىڭ 11 وڭىرىنەن 70 شاباندوز قاتىسادى.

ونىڭ ىشىندە الماتى، شىمكەنت، قاراعاندى، قىزىلوردا، ماڭعىستاۋ، الماتى، پاۆلودار، تۇركىستان جانە جەتىسۋ وبلىسىنان قوناقتار كەلەدى دەپ كۇتىلۋدە.

ايتا كەتەيىك، استانادا رەسپۋبليكا كۇنىنە وراي مەرەكەلىك وتشاشۋ بولادى.