استانادا اسكەرگە شاقىرۋشىلارعا بابالار ءداستۇرى بويىنشا قىلىش پەن قالقان تابىستالدى
اكسيا رەسپۋبليكا كۇنى قارساڭىندا ۇيىمداستىلىپ وتىر. وعان اسكەري قىزمەتىن اياقتاعان ساربازدار مەن اسكەرگە اتتانعالى تۇرعان جاستار، سونداي-اق سالا ارداگەرلەرى، كوللەدج ستۋدەنتتەرى مەن مەكتەپ وقۋشىلارى قاتىستى. شارادا ءسوز العان ق ر قورعانىس ءمينيسترىنىڭ ورىنباسارى سۇلتان قامالەتدينوۆ اسكەرگە اتتانعالى تۇرعان جاستارعا تىلەگىن ءبىلدىردى.
«بۇگىنگى جاستار - جاڭا تاريحتىڭ قۇرداستارى. سىزدەر ەركىن ەلدە تۋىپ وستىڭىزدەر. سىزدەردە بارلىق مۇمكىندىك بار. ەلىمىزدىڭ تاريحى مەن ونىڭ سالت-ءداستۇرى - ەلىمىزدى قورعايتىن جاستاردىڭ باعدارى بولۋى ءتيىس. وتان قورعاۋشىنىڭ بارلىق قىزمەتىن انىقتايتىن ءبىر عانا جوعارى سانات بار - ول بورىش. ودان جوعارى ەشتەمە جوق. قالعانى ونىمەن بايلانىسىپ جاتىر»، - دەدى ءمينيستردىڭ ورىنباسارى.
سونىمەن قاتار شارا بارسىندا بابالار داستۇرىنە ساي، اسكەري مىندەتىن اتقارىپ كەلگەن ساربازدار اسكەرگە اتتانعالى تۇرعان جاستارعا امانات ەتىپ، قىلىش پەن قالقان تابىستادى.
«شارانىڭ نەگىزگى ماقساتى - جاستارعا اسكەري-پاتريوتيزمدى دارىپتەۋ، كورسەتۋ، تاربيەلەۋ. ودان جاستار وزدەرىنە قاجەتتى كوپتەگەن قۇندى مالىمەتتەردى الادى. بۇل اكتسيانىڭ كۇزگى اسكەرگە شاقىرۋ كەزەڭىمەن تۇس كەلىپ تۇرعانى وڭتايلى بولىپ تۇر. ويتكەنى، قازىرگى مەكتەپ وقۋشىلارى، ستۋدەنتتەر مەن جاستار - ەرتەڭگى ساربازدار. وسى شارا اياسىندا ەلىمىزدەگى اسكەري وقۋ ورىندارى جاستارعا وقۋعا ءتۇسۋ ءتارتىبى، ونىڭ بولاشاعى تۋرالى مالىمەتتەردى بەرىپ جاتىر.
اكسيا بارىسىندا جاڭا اسكەري سالتتىڭ، ءداستۇردىڭ ءتۇرى - اسكەري قىزمەتىن ءبىتىرىپ، ەلگە ورالىپ جاتقان ساربازدار اسكەرگە بۇگىن شاقىرىلىپ جاتقان جاستارعا وزدەرىنىڭ اماناتىن ايتىپ، تىلەگىن ءبىلدىردى. ياعني، بابالار جولىمەن اسكەرگە شاقىرىلعاندارعا قىلىش پەن قالقان تابىستالدى»، - دەپ توقتالدى ق ر قورعانىس مينيسترلىگىنىڭ رەسمي وكىلى عاني ارتىقوۆ.
اكسيا سوڭىندا اسكەري قىزمەتىن وتەۋ كەزىندە باتىلدىعىمەن كوزگە تۇسكەن ساربازدار مەن ولاردىڭ اتا-انالارى ماراپاتتالدى.
