تۇڭعىش پرەزيدەنت كۇنى مەرەكەسىنىڭ مارتەبەسى وزگەرمەك

مۇنداي ۇسىنىس اشىق تالقىعا شىعارىلعان ۇكىمەت قاۋلىسىندا كورسەتىلگەن، دەپ حابارلايدى قازاقپارات ءتىلشىسى.

«قازاقستان رەسپۋبليكاسى پرەزيدەنتىنىڭ 2022-جىلعى 23- ماۋسىمداعى 22-32-18/22-2447-5№ ق ب پ تاپسىرماسىن ورىنداۋ ماقساتىندا، وندا 1- جەلتوقسان - تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاپ، مەملەكەتتىك رامىزدەر كۇنى، العىس كۇنى جانە قوعامدىق ماڭىزى جوعارى الەۋەتى بار وزگە دە كۇندەر سياقتى مەرەكەلەۋدى ايقىنداۋ ۇسىنىلادى»، - دەلىنگەن قاۋلى جوباسىندا.

قۇجات اشىق ن ق ا سايتىندا 3- قاراشاعا دەيىن تالقىلانادى.

ەسكە سالايىق، 7- قىركۇيەكتە پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى تۇڭعىش پرەزيدەنت كۇنىن مەملەكەتتىك مەرەكەلەر قاتارىنان الىپ تاستاۋعا باعىتتالعان زاڭ جوباسىن ماقۇلداعان بولاتىن.

ايتا كەتەيىك، بۇعان دەيىن 1- جەلتوقسان مەملەكەتتىك مەرەكە رەتىندە تويلانىپ كەلدى جانە وسى كۇنى قازاقستاندىقتارعا دەمالىس بەرىلەتىن.