قىرعىزستاندا ءار كولىكتە ۆيدەوتىركەۋىش بولۋى مىندەتتەلەدى
ءتيىستى زاڭ جوباسىن قىرعىزستاننىڭ ىشكى ىستەر مينيسترلىگى قوعامدىق تالقىلاۋعا شىعاردى، دەپ حابارلايدى قازاقپارات ءتىلشىسى قىرعىزستان رەسپۋبليكاسى مينيسترلەر كابينەتىنىڭ سايتىنا سىلتەمە جاساپ.
ستاتيستيكاعا سايكەس، قىرعىزستاندا 25 پەن 40 جاس ارالىعىنداعى بەلسەندى ەڭبەككە قابىلەتتى ادامداردىڭ %70 ى جولدا قايتىس بولادى.
زاڭ جوباسىنىڭ اۆتورلارى بۇل جاڭاشىلدىق جۇرگىزۋشىلەردىڭ جول قوزعالىسى كەزىندەگى جاۋاپكەرشىلىگىن ارتتىرىپ، ءتارتىبىن جاقسارتادى، سونداي-اق قۇقىق بۇزۋشىلىقتار مەن قىلمىستاردىڭ الدىن الۋعا، ولاردى اشۋعا وڭ اسەر ەتەدى دەپ ەسەپتەيدى.
بۇل نورمانى تراكتورلار مەن وزدىگىنەن جۇرەتىن تەحنولوگيالىق ماشينالاردى، سونداي-اق جولاۋشىلاردى تاسىمالداۋ جونىندەگى قىزمەتتى جۇزەگە اسىراتىن جانە قاۋىپتى جۇكتەردى تاسىمالدايتىن اۆتوكولىكتەردى قوسپاعاندا، قىرعىزستان اۋماعىندا العاشقى تىركەلگەن كولىك قۇرالدارى ءۇشىن 2025 -جىلعى 1-قاڭتاردان باستاپ ەنگىزۋ ۇسىنىلادى.
