اسكەرگە بارۋدان قاشقانداردى بىرنەشە جىلعا سوتتاۋ ۇسىنىلدى

وسىعان بايلانىستى ماماندار ق ر قىلمىستىق كودەكسىنە وزگەرىس ەنگىزىپ، اسكەرگە بارۋدان قاشقانداردى 1 دەن 6 جىلعا دەيىن سوتتاۋدى ۇسىندى، دەپ حابارلايدى قازاقپارات ءتىلشىسى.

پەتروپاۆل قالالىق قورعانىس ىستەرى باسقارماسىنىڭ باسشىسى باۋىرجان ەسەنەيەۆ اپپارات كەڭەسىندە كۇزگى اسكەرگە شاقىرۋ ناۋقانىنىڭ بارىسى جايىندا ايتتى.

پەتروپاۆلدا اسكەري ەسەپتە 8711 ادام تۇر. ولاردىڭ تەك 518 ءى عانا بيىل اسكەر قاتارىنا الىنباق. قالعاندارى وتباسىلىق جاعدايعا، وقۋىنا، مۇعالىم بولۋىنا بايلانىستى، دەنساۋلىعىنا قاتىستى ۋاقىتشا بوساتىلعان. ال اسكەرگە شاقىرىلۋى ءتيىس 510 جىگىتتى ماماندار تابا الماي جاتىر.

«اسكەرگە شاقىرۋ ناۋقانىن وتكىزۋدە ءبىرقاتار ماسەلە بار. سولاردىڭ ەڭ باستىسى - اسكەرگە شاقىرىلۋشىلاردىڭ جۇرگەن جەرىن انىقتاۋ. بىزدە اسكەري ەسەپتە تۇرعانداردىڭ تۇرعىلىقتى جەرى مەن ۋاقىتشا مەكەن جايى حالىققا قىزمەت كورسەتۋ ورتالىعىنىڭ ەلەكتروندى بازاسى ارقىلى ناقتىلاندى. الايدا ولار كورسەتىلگەن مەكەنجايلاردا تۇرمايدى. تاعى 180 ادام قازاقستان اۋماعىنان شىعىپ كەتكەن. بۇل ق ر ۇ ق ك سولتۇستىك قازاقستان وبلىسى بويىنشا دەپارتامەنتى شەكارا قىزمەتىنىڭ بەرگەن مالىمەتى»، - دەيدى باۋىرجان ەسەنەيەۆ.

ماماننىڭ ايتۋىنشا، اسكەرگە شاقىرىلۋشىلاردى شاقىرۋ كوميسسياسىنا كەلۋگە ماجبۇرلەيتىن زاڭدى تەتىكتەر قاراستىرىلماعان. سوندىقتان نورماتيۆتى-قۇقىقتىق اكتىلەرگە ءبىرقاتار وزگەرىس ەنگىزۋدى ۇسىنباق.

«ق ر قىلمىستىق كودەكسىنىڭ 387-بابىنا وزگەرىس ەنگىزۋدى ۇسىنامىز - اسكەري قىزمەتتەن وتۋگە باس تارتقاندارعا، شاقىرۋ ۋچاسكەسىنە، وبلىستىق جيناقتاۋ پۋنكتىنە كەلمەگەندەردى 1 جىلدان 3 جىلعا دەيىن باس بوستاندىعىنان ايىرۋ جازاسىنا كەسۋ. ال اسكەرگە بارماۋ ءۇشىن وزىنە-ءوزى جاراقات سالاتىندارعا، وتىرىك اۋىراتىندارعا، جالعان قۇجات جاسايتىندارعا جانە شاقىرۋ ۋچاسكەسىنە، وبلىستىق جيناقتاۋ پۋنكتىنە ەكى جانە ودان ارتىق كەلمەگەندەرگە 3 جىلدان 6 جىلعا دەيىن جازا كەسۋدى ۇسىنامىز»، - دەيدى باۋىرجان ەسەنەيەۆ.