الماتى ماڭىنداعى تاۋلاردا ءورت تۇتاندى

قونايەۆ. قازاقپارات - الماتى وبلىسى قاراساي اۋدانىنا قاراستى كوكلايساي ساياجاي وكرۋگى ماڭىندا قۋراعان ءشوپ ورتەندى، دەپ حابارلايدى قازاقپارات ءتىلشىسى.

ساياجاي وكرۋگى ماڭىنداعى ءشوپتىڭ جانۋى تۋرالى حابارلاما 17- قازان، ساعات 10:00-دە الماتى وبلىسى ت ج د كەزەكشى ءبولىمىنىڭ پۋلتىنە تۇسكەن.

وقيعا ورنىنا دەرەۋ دەپارتامەنتتىڭ 12 قىزمەتكەرى مەن ءۇش تەحنيكاسى، سونداي- اق ىلە- الاتاۋ ۇلتتىق تابيعي پاركىنىڭ 20 قىزمەتكەرى مەن ءتورت تەحنيكاسى جىبەرىلدى.

«وقيعا ورنىنا (ءورت ءسوندىرۋ بولىمىنەن 30 شاقىرىم) ساعات 10:39-دا جەتكەن كەزدە تاۋدىڭ باۋرايىندا شامامەن 10 گەكتار اۋماقتا ءشوپتىڭ جانىپ جاتقانى انىقتالدى. ەلدى مەكەندەرگە قاۋىپ جوق. كوكلايساي ساياجاي وكرۋگىنىڭ ماڭىندا ءورتتى ءسوندىرۋ جۇمىستارى جالعاسىپ جاتىر»، - دەپ حابارلادى الماتى وبلىسى ت ج د باسپا ءسوز قىزمەتى.