قازاقستاندا تەرروريزمدى قارجىلاندىرۋعا قارسى ءىس-قيمىل كۇشەيتىلمەك

قارجىلىق مونيتورينگ اگەنتتىگىنەن ءمالىم ەتكەندەي، تۇجىرىمداما حالىقارالىق ستاندارتتاردى، سونداي-اق كىرىستەردى جىلىستاتۋ مەن تەرروريزمدى قارجىلاندىرۋدىڭ وزەكتى قاتەرلەرىن ەسكەرە وتىرىپ ازىرلەنگەن.

ازاماتتار مەن قارجىلىق مونيتورينگ سۋبەكتىلەرى اراسىندا كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل ماسەلەلەرى (بۇدان ءارى – ا ج/ت ق ق) بويىنشا كەڭ اۋقىمدى اقپاراتتىق جۇمىس جۇرگىزۋ جوسپارلانىپ وتىر. جوعارى وقۋ ورىندارىندا، كوللەدجدەردە جانە مەكتەپتەردە قارجىلىق قاۋىپسىزدىك تاقىرىبىندا دارىستەر وتكىزىلەدى. بۇل جۇمىس اكىمدىكتەرمەن جانە مۇددەلى مەملەكەتتىك ورگاندارمەن بىرلەسىپ جۇيەلى نەگىزدە جۇرگىزىلەدى.

قازىرگى ۋاقىتتا ا ج/ت ق ق سالاسىنداعى مامانداردى دايارلاۋ جانە ولاردىڭ بىلىكتىلىگىن ارتتىرۋ ءۇشىن وقۋ باعدارلاماسى جوق. تۇجىرىمدامانى ىسكە اسىرۋ جاعدايدى وزگەرتۋگە مۇمكىندىك بەرەدى. وسى ماقساتتار ءۇشىن مامانداندىرىلعان وقۋ ورنىن قۇرۋعا ارنالعان جۇمىستار باستالدى.

سونداي-اق، قارجىلىق مونيتورينگ سۋبەكتىلەرىنىڭ، وزگە دە ۇيىمدار مەن ازاماتتاردىڭ قۇقىقتىق جاعدايىن ناقتىلاۋ بولىگىندە فاتف ستاندارتتارىن ۇلتتىق زاڭناماعا يمپلەمەنتاتسيالاۋ جالعاسىپ جاتىر. اكتيۆتەردى بۇعاتتاۋ جونىندەگى شارالاردى ىسكە اسىرۋ ناتيجەسىندە قۇقىقتارى بۇزىلعان ادال ءۇشىنشى تۇلعالاردىڭ قۇقىقتارىن قورعاۋدى قامتاماسىز ەتەتىن تەتىكتەر كوزدەلگەن.

قۇجات سونىمەن قاتار، قولدانىستاعى ا ج/ت ق جۇيەسىن جەتىلدىرۋدى قاراستىرادى. وسى ماقساتتا قارجىلىق مونيتورينگ سۋبەكتىلەرىنىڭ كۇدىكتى قىزمەت تۋرالى حابارلامالاردى حابارلاۋ پراكتيكاسى ەنگىزىلەدى. قارجىلىق بارلاۋ بولىمشەسىنىڭ تالدامالىق الەۋەتىن بيۋدجەت قاراجاتىنىڭ جۇمسالۋىن مونيتورينگىلەۋ ءۇشىن پايدالانۋ جوسپارلانىپ وتىر. كىرىستەردى جىلىستاتۋ جانە تەرروريزمدى قارجىلاندىرۋ تاۋەكەلدەرىنىڭ بولۋىنا جاڭا قارجىلىق قىزمەتتەر تالدانادى.

كىرىستەردى جىلىستاتۋ تاۋەكەلدەرىن انىقتاۋدىڭ جەدەلدىگى بيزنەس-پروتسەستەردى اۆتوماتتاندىرۋ، اقپاراتتىق جۇيەلەر بازالارىن ينتەگراتسيالاۋ، ۇلكەن دەرەكتەردى تالداۋ قۇرالدارىن ەنگىزۋ ەسەبىنەن قامتاماسىز ەتىلەدى.

قارجىلىق مونيتورينگ سۋبەكتىلەرى مەن مەملەكەتتىك رەتتەۋشى ورگانداردىڭ بەلسەندى ءوزارا ءىس- قيمىلى ءۇشىن اگەنتتىك پورتالىنىڭ فۋنكسيونالىن پىسىقتاپ جەتىلدىرۋ كوزدەلگەن.

سيفرلىق اكتيۆتەر نارىعىنىڭ قارقىندى ءوسۋى كىرىستەردى جىلىستاتۋدى جانە ولاردى پايدالانۋ ارقىلى جاسالعان تەرروريزمدى قارجىلاندىرۋدى مونيتورينگىلەۋ جانە بولدىرماۋ جونىندەگى مىندەتتەردى قوسۋعا سەبەپ بولدى. تۇجىرىمدامادا قارجىلىق مونيتورينگ سۋبەكتىلەرى ءۇشىن سيفرلىق اكتيۆتەردىڭ اينالىمىنا بايلانىستى كۇدىكتى وپەراتسيالار تۋرالى حاباردار ەتۋ رەجيمىن كۇشەيتۋ كوزدەلگەن.

وسى مىندەتتى ىسكە اسىرۋ ءۇشىن اگەنتتىك Binance حالىقارالىق كريپتوبيرجاسىمەن ىنتىماقتاستىق تۋرالى مەموراندۋمعا قول قويدى. ونىڭ نەگىزگى ماقساتى - قىلمىستىق جولمەن الىنعان، سونداي-اق كىرىستەردى جىلىستاتۋعا جانە تەرروريزمدى قارجىلاندىرۋعا ارنالعان سيفرلىق اكتيۆتەردى پايدالانا وتىرىپ، وپەراتسيالاردى بەلگىلەۋ جانە بۇعاتتاۋ بويىنشا اقپارات الماسۋ.

زاڭسىز قارجىلىق وپەراتسيالاردى قاداعالاۋ جونىندەگى جۇمىسقا IT قۇرالدار ەنگىزىلمەك. قىلمىستىق ىستەر بويىنشا زاتتاي دالەلدەمەلەردى الۋ، ەسەپكە الۋ، ساقتاۋ، بەرۋ جانە جويۋ ءتارتىبى سيفرلىق اكتيۆتەرگە بايلانىستى ەرەكشەلىكتەردى قوسۋ بولىگىندە قايتا قارالادى.

ا ج/ت ق ق سالاسىن دامىتۋدىڭ نەگىزگى باعىتتارىنىڭ ءبىرى - قىلمىستىق كىرىستەردى ىزدەۋ جانە قايتارۋ. بۇل مىندەتتى ىسكە اسىرۋ ءۇشىن كاپيتال جىلىستايتىن يۋريسديكسيالارمەن شارتتىق- قۇقىقتىق بازانى كەڭەيتۋ، اكتيۆتەردى ىزدەۋ بويىنشا IT قۇرالدارىن ەنگىزۋ جوسپارلانعان.