كومىر باعاسى ءوستى ما

مينيسترلىكتىڭ باسپا ءسوز قىزمەتىنىڭ حابارلاۋىنشا، اتالعان ماسەلە مينيسترلىكتىڭ ەرەكشە باقىلاۋىندا.

بۇگىنگى تاڭدا Halyk Market پلاتفورماسىنا وڭىرلىك وپەراتورلاردى قوسۋ جۇمىستارى جالعاسۋدا. قازىر 428 وڭىرلىك وپەراتوردىڭ تەك ەكەۋى عانا وسى پلاتفورما ارقىلى كومىردى الەۋمەتتىك باعامەن ساۋدالايدى.

اتاپ ايتقاندا، قوستاناي وبلىسى مەن الماتى قالاسىندا ورنالاسقان وپەراتورلار. ەندىگى كەزەكتە پلاتفورماعا قوسىلۋ ءۇشىن سولتۇستىك قازاقستان، قىزىلوردا، پاۆلودار، قاراعاندى جانە جامبىل وبلىستارى تاراپىنان وتىنىمدەر كەلىپ تۇسكەن.

«جەرگىلىكتى اتقارۋشى ورگاندار Halyk Market قوسىمشاسىنا وڭىرلىك وپەراتورلاردى قوسۋ بويىنشا جۇمىستى كۇشەيتىپ، بۇل ءۇردىستى سيفرلىق فورماتقا اۋىستىرۋلارى قاجەت. سونداي-اق حالىقتى جانە كوممۋنالدىق-تۇرمىستىق سەكتوردى كومىرمەن قامتاماسىز ەتۋ جونىندەگى اقپاراتتى ۋاقىتىلى ۇسىنىپ وتىرۋدى تاپسىرامىن»، - دەدى قايىربەك وسكەنبايەۆ.

يندۋستريالىق دامۋ كوميتەتىنىڭ ءتوراعاسى ي. وسپانوۆتىڭ ايتۋىنشا، بۇگىنگى تاڭدا وڭىرلەرگە قاجەتتى 9 ميلليون توننا كومىردىڭ 4 ميلليون تونناسى جەتكىزىلگەن. بۇل كورسەتكىش جىلدىق جوسپاردىڭ %44,3 قۇرايدى. قامتاماسىز ەتۋ كورسەتكىشتەرى مەن قاجەتتىلىك كولەمىنىڭ تومەندەۋى جەرگىلىكتى اتقارۋشى ورگانداردىڭ جىلىتۋ ماۋسىمىنا حالىقتىڭ جىلدىق جوسپارلى قاجەتتىلىك كولەمىنە ەنگىزگەن تۇزەتۋلەرىنە بايلانىستى ەكەنىن اتاپ وتكەن ءجون.

ايتا كەتەرلىگى، كەيبىر بۇقارالىق اقپارات قۇرالدارىندا ەلىمىز بويىنشا كومىردىڭ باعاسى ايتارلىقتاي ءوستى دەگەن اقپار تارادى. وسىعان بايلانىستى ۆەدومستۆو باسشىسى ەلىمىزدىڭ كومىر رازرەزدەرىنىڭ وكىلدەرىن جيناپ، اقپاراتتىڭ انىق-قانىعىن انىقتادى. رازرەزدەردەگى كومىردىڭ قۇنى وتكەن جىلعى دەڭگەيدە ساقتالعان. ماسەلەن، قازاقستانداعى ەڭ ءىرى كومىر وندىرۋشىلەردىڭ ءبىرى «شۇباركول كومىر» ا ق ءبىر توننا كومىردى 5500 تەڭگەدەن ساتسا، «مايكۋبەن-ۆەست» ج ش س كومىردى 6105 تەڭگەدەن، ال «قاراجىرا» ا ق تونناسىنا 8300 تەڭگەدەن ساۋدالايدى. بۇدان باسقا، گەوگرافيالىق ورنالاسۋى، تاسىمالداۋ ءادىسى جانە كومىر ماركاسىنا بايلانىستى قۇنى تونناسىنا 8 مىڭنان (رازرەزگە جاقىن ورنالاسقان ەلدى- مەكەندەردە) 21600 تەڭگەگە دەيىن اۋىتقيدى.

«جالپى حالىقتى قاتتى وتىنمەن قامتاماسىز ەتۋ ءۇشىن مينيسترلىك تاراپىنان ءبىرقاتار ناقتى شارا قابىلدانعان. اتاپ ايتقاندا، الداعى جىلىتۋ ماۋسىمى كەزەڭىندە وتىن تاپشىلىعىن بولدىرماۋ ماقساتىندا قر يندۋستريا جانە ينفراقۇرىلىمدىق دامۋ مينيسترلىگى جىلىتۋ ماۋسىمى كەزەڭىندە اۆتوموبيل كولىگىمەن كومىردى ەلدەن تىس جەرگە شىعارۋدى 6 ايعا شەكتەۋ تۋرالى بۇيرىق قابىلدادى. شەشىم كومىر رازرەزدەرىنىڭ وكىلدەرى جانە ءوڭىر اكىمدىكتەرىمەن بىرلەسە وتىرىپ ازىرلەنگەن»، - دەلىنگەن حابارلامادا.