قازاقستان مەن تۇرىكمەنستان پرەزيدەنتتەرى بىرلەسكەن مالىمدەمە قابىلدادى
«تۇرىكمەنستان پرەزيدەنتى رەتىندە قازاقستانعا العاشقى مەملەكەتتىك ساپارمەن كەلگەنىڭىز ءۇشىن شىنايى ريزاشىلىعىمدى بىلدىرەمىن. بۇل ساپاردىڭ ايرىقشا ءمان-ماڭىزى بار. بيىل قازاقستان مەن تۇرىكمەنستان اراسىندا ديپلوماتيالىق قارىم-قاتىناس ورناعانىنا 30 جىل تولىپ وتىر. وسى كەزەڭ ىشىندە ىنتىماقتاستىعىمىز بارىنشا نىعايا ءتۇستى. تۇرىكمەنستان ءبىز ءۇشىن باۋىرلاس، دوستاس ەل. سونداي-اق ماڭىزدى ءارى سەنىمدى سەرىكتەس. ەلدەرىمىزدىڭ سالت-ءداستۇرى، مادەنيەتى، ءتىلى مەن ءدىنى ۇقساس، تاريحى تامىرلاس. ءبىز ءتۇبى ءبىر تۇركى حالىقتارىمىز»، - دەدى قازاقستان پرەزيدەنتى بىرلەسكەن مالىمدەمەگە قول قويۋ راسىمنەن كەيىن.
مەملەكەت باسشىسى ەكى ەل ءاردايىم ءبىر-بىرىنە قولداۋ كورسەتىپ كەلە جاتقاندىعىن باسا ايتتى.
«وسىنداي قۇندىلىقتار ەڭ باستى بايلىعىمىز. سوندىقتان باۋىرلاس قارىم-قاتىناستى نىعايتۋ ورتاق پارىزىمىز. بۇگىن ەكى ەلدىڭ مۇددەسىنە ساي كەلەتىن اسا ماڭىزدى ۋاعدالاستىقتارعا قول جەتكىزدىك. حالىقارالىق جانە وڭىرلىك وزەكتى ماسەلەلەر بويىنشا پىكىر الماستىق. سونداي-اق بىرلەسكەن مالىمدەمە قابىلدادىق. ءبىرقاتار ماڭىزدى كەلىسىمشارتقا قول قويدىق. وسى ساپار قازاق-تۇرىكمەن ىنتىماقتاستىعىن دامىتۋعا تىڭ سەرپىن بەرەدى دەپ سەنەمىن»، - دەدى قاسىم-جومارت توقايەۆ.
