تۇركيا كەلەسى جىلدان باستاپ تۋريستەرگە سالىقتىڭ جاڭا ءتۇرىن سالادى

بۇل تۋرالى ەلدىڭ قارجى مينيسترلىگى مالىمدەدى، دەپ حابارلايدى قازاقپارات ءتىلشىسى.

زاڭ جوباسىنا سايكەس، قوناق ۇيلەر، دەمالىس ورىندارى، اپارتامەنتتىك قوناق ۇيلەر جانە ت. ب. اۋماعىندا تۇرۋدى قوسا العاندا، بارلىق قىزمەتتەرگە 2 پايىزدىق سالىق الىنادى.

بۇل سالىقتىڭ مولشەرلەمەسى ناقتى ايماقتاردىڭ جەرگىلىكتى اتقارۋشى ورگاندارىنىڭ قاراۋى بويىنشا وزگەرۋى مۇمكىن.

سونىمەن قاتار، زاڭ جوباسى ەل پارلامەنتىنىڭ قاراۋىنا جىبەرىلگەن ساتتەن باستاپ تۋريستىك بيزنەس تاراپىنان ەكىۇشتى سۇراقتار تۋىنداپ وتىر.

مىسالى، وندا اقىنى تۋريستەر تىركەلۋ كەزىندە تولەۋى كەرەكتىگى ايتىلعان، ءبىراق پاكەتتىك تۋرلار اياسىندا تۇركياعا كەلگەن شەتەلدىك ازاماتتاردى ورنالاستىرۋ كەزىندە نە ىستەۋ كەرەكتىگى تۇسىنىكسىز.

شەتەلدىك تۋروپەراتورلارمەن جۇمىس ىستەيتىن قوناقۇيلەر كەلىسىمشارتىنا تۋريستەن 2 پايىزدىق الىم الىنادى دەگەن تارماقتى ەنگىزبەسە، سالىقتى قازىناعا وزدەرى تولەۋى ابدەن مۇمكىن دەيدى ماماندار.

تۋريستىك ءونىمدى ساتۋ كەزىندە بۇل ناقتى قاراستىرىلماسا، تۋريستەردىڭ ءوز بەتىنشە سالىق تولەۋى ەكىتالاي.

تۇركيا 2019-جىلى «تۇرعىلىقتى جەر سالىعىن» ەنگىزۋ تۋرالى شەشىم قابىلدادى.

سودان بەرى كوروناۆيرۋس پاندەمياسى مەن تۋريزمنىڭ ايتارلىقتاي تومەندەۋىنە بايلانىستى زاڭنىڭ كۇشىنە ەنۋى بىرنەشە رەت كەيىنگە قالدى.

تۇرىك ەكونوميكاسى قازىرگى ۋاقىتتا ماڭىزدى رەتسەسسيانى باستان كەشىرىپ وتىر، مۇندا تۋريزم - نەگىزگى كىرىس سەكتورلارىنىڭ ءبىرى.

بيىل رەسەي مەن ۋكراينا اراسىنداعى اسكەري قاقتىعىسقا قاراماستان ەلدەگى تۋريستىك اعىننىڭ جاقسى قالپىنا كەلۋ قارقىنى بايقالدى، بۇل دا شەتەلدىك تۋريستەردەن جاڭا الىم ەنگىزۋگە سەبەپ بولدى.