اۋعانستاننىڭ قازىرگى بيلىگىمەن جۇمىس ىستەۋ كەرەك - ۆلاديمير پۋتين
«ءبىز تاليبان قوزعالىسىنىڭ باسشىلىعىمەن قاجەتتى بايلانىستى قولدايمىز. اۋعانستاندا ازاماتتىق سوعىستى قايتا بولدىرماۋ ءبىزدىڭ مۇددە ءۇشىن ماڭىزدى. ەكونوميكالىق قۇلدىراۋ جاعدايىندا تاليبان ۇكىمەتى اۋعانستان ءۇشىن ءداستۇرلى اقشا ءوندىرۋدىڭ كەيبىر تۇرىنە جول بەرۋگە ءماجبۇر. ونىڭ ىشىندە ەسىرتكى بيزنەسى دە بار. مۇنى ءبارى دە بىلەدى»، - دەدى ۆلاديمير پۋتين استانادا ءوتىپ جاتقان «ورتالىق ازيا - رەسەي» سامميتىندە.
سونداي- اق، رەسەي فەدەراتسياسىنىڭ باسشىسى اۋعانستاننىڭ قازىرگى بيلىگىمەن بىرلەسىپ جۇمىس ىستەۋ كەرەكتىگىن ايتتى.
«شەتەلدىك ارنايى قىزمەتتەردىڭ قىسىمىمەن تاليباندار سولتۇستىكتە لاڭكەستەردىڭ تىرەك بازالارىن سالۋىنا كوز جۇما قارايدى. ارينە، ءبىز اۋعانستاننىڭ قازىرگى بيلىگىمەن جۇمىس ىستەۋىمىز كەرەك. بۇل - ءبىزدىڭ وسى باعىتتاعى بىرلەسكەن جۇمىستى مۇقيات تالداۋ مەن ۇيلەستىرۋدىڭ نەگىزى»، - دەيدى ول.
بۇعان دەيىن ۆ. پۋتين رەسەي مەن ورتالىق ازيا ەلدەرى اراسىندا پەرسپەكتيۆاعا يە باعىتتارعا توقتالعان ەدى.
ايتا كەتەيىك، استانادا «ورتالىق ازيا - رەسەي» ءسامميتى ءوتىپ جاتىر. جيىنعا 6 ەلدىڭ باسشىسى قاتىسۋدا .
