پۋتين رەسەي مەن ورتالىق ازيا قانداي سالالاردا ىنتىماقتاستىق ورناتا الاتىنىن ايتتى

«ءبىزدىڭ ەل ورتالىق ازيانىڭ بىرلەسكەن ەنەرگيا جۇيەسىن قالپىنا كەلتىرۋگە پراكتيكالىق كومەك كورسەتۋگە دايىن. بۇل وڭىردەگى بۇكىل ەلدەردىڭ ەنەرگەتيكالىق قاۋىپسىزدىگىن ارتتىرا تۇسەتىنى ءسوزسىز. رەسەي مەن ورتالىق ازيا ەلدەرى اراسىندا ەنەرگەتيكالىق قاۋىپسىزدىك سالاسىنداعى ىنتىماقتاستىق نىعايىپ كەلەدى. رەسەي ورتالىق ازيا ەلدەرىنىڭ ەكونوميكاسىنا جەتەكشى ينۆەستور. باتىس كومپانيالارى مەن وپەراتورلارىنىڭ قاجەتسىز قاتىسۋىن بولدىرمايتىن قارجىلىق ەسەپ ايىرىسۋ تەتىكتەرىن قايتا قۇرۋ جانە قايتا رەتتەۋ تەتىگى ىسكە قوسىلدى»، - دەدى ۆلاديمير پۋتين استانادا ءوتىپ جاتقان «ورتالىق ازيا - رەسەي» سامميتىندە.

رەسەي باسشىسىنىڭ مالىمدەۋىنشە، تىكەلەي ينۆەستيتسيا كولەمى شامامەن 5 ميلليارد دوللاردى قۇرايدى.

«SWIFT- ءتىڭ ورنىنا قازىردىڭ وزىندە جاقسى قالىپتاسقان رەسەيلىك قارجىلىق حابارلاما بەرۋ جۇيەسىنىڭ كەلىسىمشارتتىق ەسەبىن قولدانۋعا كوشىپ جاتىرمىز. مۇناي تاسىمالداۋ باعىتتارىن كەڭەيتۋ، كاسپي تەڭىزىندە ەنەرگيا رەسۋرستارىنىڭ قورىن بىرلەسىپ يگەرۋ، قولجەتىمدى جانە تازا گاز موتورلى وتىنمەن قامتاماسىز ەتۋدىڭ پەرسپەكتيۆاسى زور. سونداي- اق، قۇبىرلاردى سالۋ جانە كەڭەيتۋ، كومىر ساۋداسى مەن ونى ازيا نارىعىنا تاسىمالداۋ كولەمىن ۇلعايتۋ دا ماڭىزدى»، - دەيدى ول.

ايتا كەتەيىك، استانادا «ورتالىق ازيا - رەسەي» ءسامميتى ءوتىپ جاتىر. جيىنعا 6 ەلدىڭ باسشىسى قاتىسۋدا.