اتىراۋدا وقۋشىلاردىڭ تەرىس قىلىعىنان كەيىن بۇكىل مەكتەپتەردە اتا-انالار جينالىسى وتەدى

اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ مالىمەتىنشە، 17-21-قازان ارالىعىندا وبلىستىڭ بارلىق مەكتەبىندە اتا-انالار جينالىسى وتەدى.

بۇعان وقۋشىلار تاراپىنان ورسەكەل ارەكەتتەردىڭ قايتالانۋى سەبەپ بولىپ وتىر.

«سوڭعى كەزدە ءوڭىر جۇرتشىلىعى ورتا مەكتەپ وقۋشىلارىنىڭ مىنەز-قۇلقىنا الاڭداۋشىلىق ءبىلدىرىپ وتىر. ويتكەنى، وقۋشىلار تاراپىنان بىرنەشە رەت ورەسكەل ارەكەتتەر تىركەلدى. اتا-انالار جينالىسىن وتكىزۋگە اتىراۋ قالاسىنداعى ورتا مەكتەپتىڭ بىرىندە «بومبا قويىلعانى» تۋرالى جالعان حابار دا سەبەپ بولدى. جالعان حابار تاراتقان سول مەكتەپتىڭ وقۋشىسى - 2008 -جىلى تۋعان جاس ءوسپىرىم ەكەنى انىقتالدى. الەۋمەتتىك جەلىدە تاعى ءبىر مەكتەپتىڭ وقۋشىلارىنىڭ ەلەكتروندى تەمەكى تارتىپ تۇرعان ۆيدەوسى تارادى. مۇنداي وقيعالاردىڭ بارلىعى جۇرتشىلىقتى الاڭداۋشىلىعىن تۋعىزدى»، - دەيدى جاسۇلان بيسەمبيەۆ.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇدان بىرنەشە كۇن بۇرىن اتىراۋ قالاسىنىڭ ماڭىنداعى اۋىلدىق وكرۋگتىڭ بىرىندە مەكتەپ وقۋشىلارىنا ەنەرگەتيكالىق قوسپاسى بار ۇنتاق ساتىلعانى انىقتالعان. مەكتەپتىڭ جوعارى سىنىبىندا وقيتىن وقۋشىلار كىشكەنتاي بالالاردان اقشا سۇراپ، الىمجەتتىك كورسەتەتىنى تۋرالى اقپارات تارادى.

ال، جىلىوي اۋدانىنىڭ ورتالىعى - قۇلسارى قالاسىندا جاسوسپىرىمدەر «قىزعالداق» بالاباقشاسىنا جاسىرىنىپ كىرىپ، ويىنشىقتار مەن گۇلدەردى شاشىپ، استان-كەستەڭىن شىعارعان.

وسى دەرەككە قاتىسى بار 9 جاس ءوسپىرىم ۇستالدى. ولار - 6-7-سىنىپتا وقيتىن وقۋشىلار.

«اتىراۋ وبلىسىنىڭ مەكتەپتەرىندە وقۋشىلاردىڭ اتا-انالارىمەن كەزدەسۋ وتكىزۋگە شەشىم قابىلداندى. كۇن تارتىبىندە قۇقىق بۇزۋشىلىقتاردىڭ الدىن الۋ، ءتارتىپ پەن تاربيە ماسەلەلەرى تالقىلانادى»، - دەپ ءمالىم ەتتى جاسۇلان بيسەمبيەۆ.

ەسكە سالا كەتەلىك، بۇعان دەيىن اتىراۋدا ەلەكتروندى تەمەكى تارتقان وقۋشىلاردىڭ اتا-انالارىنا ايىپپۇل سالىنعانىن، 14 جاسار وقۋشى مەكتەپكە بومبا قويىلعانى تۋرالى جالعان حابار بەرگەنىن جازعان بولاتىنبىز.