الماتىنىڭ جاڭا باس جوسپارى جىل سوڭىنا دەيىن قابىلدانادى
بۇل تۋرالى ەربولات دوسايەۆ اۋەزوۆ اۋدانىنىڭ تۇرعىندارىمەن كەزدەسۋىندە ءمالىم ەتتى، دەپ حابارلايدى قازاقپارات ءتىلشىسى.
كەزدەسۋگە كەلگەن تۇرعىنداردىڭ ءبىرى قالاداعى قۇرىلىس كومپانيالارىنىڭ جاۋاپسىزدىعىنا شاعىمداندى.
«نەگە قۇرىلىسشىلار ەشكىممەن ساناسپايدى؟ ولار وزەن ارناسىنىڭ ماڭىندا قۇرىلىس جۇرگىزەدى. ءبىز سەيسميكالىق ايماقتامىز. ەگەر كەنەتتەن ۇيلەر قۇلاپ، ارنا بىتەلىپ، سەل جۇرسە شە؟ بۇل تۋرالى بىرەۋ ويلادى ما؟»، - دەپ سۇرادى قالا تۇرعىنى.
ەربولات دوسايەۆ اكىمدىك جىل سوڭىنا دەيىن «الماتى قالاسىنىڭ 2040-جىلعا دەيىنگى باس جوسپارىن» ازىرلەپ، قابىلداۋدى جوسپارلاپ وتىرعانىن ايتتى.
«وندا قۇرىلىستى قاي جەرگە سالۋعا بولادى، قاي جەردە سالۋعا بولمايدى - بارلىعى كورسەتىلەدى. نۇكتەلى جانە تىعىز قۇرىلىس بويىنشا جاڭا ەرەجە قابىلداندى، وندا قۇرىسشىلارعا ءبىراز شەكتەۋ قويىلدى. بۇل ەرەجەلەر ۇزاق ۋاقىت قولدانىلادى دەپ ۇمىتتەنەمىن، اقىرى رەتكە كەلتىرە الاتىن بولدىق. ال وزەن ارناسىنىڭ بويىنداعى عيماراتتارعا كەلسەك، قالا قۇرىلىسى تالاپتارىنا سايكەس سۋ قورعاۋ ايماعىنان 35 مەتردەن جاقىن ەمەس جەردە ورنالاسۋى كەرەك»، - دەدى ەربولات دوسايەۆ.
اكىمنىڭ ايتۋىنشا، بارلىق جەردە، اسىرەسە الماتىدا ساپا تالاپتارى مەن قۇرىلىس ءتارتىبى ماسەلەسى وتە ماڭىزدى.
«ويتكەنى، ءبىز 9-10 بالدىق سەيسميكالىق ايماقتا تۇرامىز. ءبىز بۇل جۇمىستى مەملەكەت باسشىسىنىڭ تاپسىرماسىمەن اتقارىپ جاتىرمىز. كەلەسى جىلى اكىمدىك قاجەتتى تالاپتاردى پىسىقتايدى. قالا جۇيەلى تۇردە قالىپتى داميدى دەپ ۇمىتتەنەمىن»، - دەدى ول.
