سەمەي جىلۋسىز قالۋى مۇمكىن: قالا اكىمدىگى دەپۋتات كوتەرگەن ماسەلەگە جاۋاپ بەردى

سەمەي. قازاقپارات - سەنات دەپۋتاتى اينۇر ارعىنبەكوۆا اباي وبلىسىنىڭ ەسكىرگەن جىلۋ- ەلەكتر ورتالىعى ماسەلەسىن كوتەرىپ، پرەمەر- مينيسترگە ساۋال جولداعان ەدى.

وسى رەتتە قالا باسشىلىعى بۇل ماسەلەگە تۇسىنىك بەردى، دەپ حابارلايدى قازاقپارات ءتىلشىسى.

سەناتور جىلىتۋ ماۋسىمى كەزىندە جاعدايى ناشار جەرگىلىكتى ج ە و سەمەي قالاسى تۇرعىندارىنىڭ دەنساۋلىعى مەن ومىرىنە ءقاۋىپ ءتوندىرىپ وتىرعانىن ايتقان.

ونىڭ سوزىنشە، جاڭادان قۇرىلعان وبلىستا الەۋمەتتىك ماڭىزى بار وبەكتىلەردى جوندەۋگە قارجىنىڭ جوقتىعى تۇيتكىلدى ماسەلەگە اينالدى.

وسى رەتتە سەمەي اكىمدىگى اتالعان ماسەلەگە وراي جاۋاپ بەردى.

«قالانىڭ ينفراقۇرىلىمى قاتتى توزعان. جىلۋ - ەڭ كۇردەلى ماسەلەلەردىڭ ءبىرى بولىپ وتىر. بۇل جايت وبلىس اكىمىنىڭ تىكەلەي باقىلاۋىندا. قازىرگى تاڭدا جىلىتۋ ماۋسىمى بويىنشا بارلىق قاجەتتى جۇمىستار ۋاقىتىلى جۇرگىزىلدى. جىلۋ كوزدەرىنىڭ جابدىقتارى جارامدى كۇيدە»، - دەلىنگەن اقپاراتتا.

سەمەيدە جىلىتۋ ماۋسىمى اۋا رايىنا بايلانىستى 29-قىركۇيەكتە باستالعان.

كومىر قورى جەتكىلىكتى. اتاپ ايتقاندا، 40,5 مىڭ توننانى قۇرايدى. قاجەت بولعان جاعدايدا 10 كۇندىك قور - 28 مىڭ توننا بار.

«جىلىتۋ ماۋسىمىنىڭ تەحنيكالىق جەلىسى بويىنشا پروبلەمالار جوق. ءبىراق ەكونوميكالىق تۇرعىدا ماسەلەلەر بار. كرەديتورلىق بەرەشەك پەن جالاقىنىڭ ۋاقىتىندا بەرىلمەيتىنى راس. بۇل ماسەلەلەر وبلىستىڭ قالالىق، جەرگىلىكتى بيۋدجەتىنەن قاراجات ءبولۋ جولىمەن شەشىلەدى. سونداي- اق رەسپۋبليكالىق بيۋدجەتتەن سۋبسيديا ءبولۋ ماسەلەسى قاراستىرىلىپ جاتىر»، - دەلىنگەن حابارلامادا.