اياقتى نەگە دىرىلدەتەسىز؟
استانا. قازاقپارات - ومىرىڭىزدە ءبىر رەت بولسىن اياعىڭىزدى ەرىكسىز دىرىلدەتكەنىڭىزدى بايقاعان بولارسىز؟!
ال كەي ادامداردىڭ مۇنى ءجيى ىستەيتىنى سونشالىق، تەك وزدەرىنە ەمەس، اينالاسىنداعىلارعا دا جاعىمسىزدىق تۋدىرادى. وعان قوسا، بۇل ادەت دەنساۋلىققا قاتىستى پروبلەمالاردى ەسكەرتۋى مۇمكىن. ەندەشە، اياقتى دىرىلدەتكىڭىز كەلۋىنىڭ سەبەبى نەدە؟
نەۆروزدىق بۇزىلىس
كەي مامانداردىڭ ويىنشا، اياقتى دىرىلدەتۋ ادامعا ءوزىن-ءوزى تىنىشتاندىرۋىنا كومەكتەسەدى، سەبەبى مي بۇل ساتتە مازاسىز ويلاردان باسقا ىسكە كوشەدى.
اياقتى دىرىلدەتۋ ادەتىندە تۇرعان ەشتەڭە جوق دەپ ويلاۋ قاتە. ەگەر ونىمەن ۋاقىتىندا كۇرەستى باستاماساڭىز، ول سوزىلمالىعا اينالىپ، ءارقاشان جاعىمسىزدىق تۋدىراتىن بولادى. ەگەر اياقتى دىرىلدەتۋدى پسيحيكالىق جاعدايىڭىزدىڭ ناشارلاۋىمەن بايلانىستىرساڭىز، پسيحوتەراپەۆت نەمەسە نەۆرولوگتىڭ كەڭەسىن الىڭىز.
تۋرەتتا سيندرومى
تۋا بىتكەن گەنەتيكالىق تارتۋ (دەنە مۇشەسىنىڭ تارتىلىپ قالۋى) كەزىندە ادامعا تۋرەتتا سيندرومى دياگنوزى قويىلادى. اياق اۋرۋى سەبەبىنەن جاعىمسىز سەزىم پايدا بولادى. ادام بۇل جاعىمسىزدىقتان ارىلۋ ءۇشىن اياعىن قوزعاي بەرەدى. تۋرەتتا سيندرومى ءجيى كەشكە جانە تۇندە پايدا بولادى. ايتپاقشى، اتاقتى ءانشى بيللي ايليش وسى اۋرۋمەن قينالادى.
مازاسىز اياق سيندرومى
مازاسىز اياق سيندرومى كەزىندە تۇنگى ۋاقىتتا اياقتا جاعىمسىزدىق پايدا بولادى جانە قاتتى اۋىرادى. بۇل جاعدايدا ادام اۋرۋدى باسۋ ءۇشىن اياعىن دىرىلدەتەدى. مازاسىز اياق سيندرومىنىڭ پايدا بولۋ سەبەبىنىڭ ءبىرى — تەمىر جەتىسپەۋشىلىگى. وعان جۇكتى ايەلدەر جانە ۆاريكوزبەن قينالاتىن ادامدار ءجيى شالدىعادى. بۇل سيندرومنىڭ پايدا بولۋىنا جۇلىن، باس شايقالۋى جانە ونى جارالاپ الۋ دا سەبەپشى بولا الادى. مۇنداي جاعدايلاردا وزدىگىنەن ەمدەلمەي، دارىگەرگە كورىنۋ كەرەك.
اياقتى دىرىلدەتۋ ادەتىنەن قالاي ارىلۋعا بولادى؟
ەگەر اياقتى دىرىلدەتۋ تۋا بىتكەن نەمەسە اۋرۋعا بايلانىستى بولسا، جۇيەلى تۇردە دارىگەرگە قارالىپ، ونىڭ ۇسىنىستارىن ورىنداۋ قاجەت. ءبىراق ەگەر اشۋلانعاندا، كۇيزەلگەندە اياقتى دىرىلدەتەتىنىڭىزدى بايقاساڭىز، تومەندەگى كەڭەستەرگە كوز جۇگىرتىڭىز.
ۇيقىنى رەتتەۋ
ءبىر قاراعاندا قاراپايىم كەڭەس سەكىلدى كورىنەدى. ءبىراق ۇيقىنى رەتتەۋ وڭاي ەمەس. اسىرەسە، ەگەر كوپ جۇمىس ىستەسەڭىز نەمەسە جايعا دەيىن قىدىرعاندى جاقسى كورسەڭىز، ۋاقىتىندا ۇيىقتاپ كەتۋ قيىن بولادى. اعزانى ناقتى رەجيمگە ۇيرەتۋ ءۇشىن كۇن ءتارتىبىن قايتا قاراستىرىپ، جاتىن بولمەنى جايلى ەتىپ ۇيىمداستىرۋ كەرەك.
قانداعى تەمىر دەڭگەيىن باقىلاۋ
قانداعى تەمىر - گەموگلوبيننىڭ ءبىر بولىگى. ونىڭ نەگىزگى قىزمەتى - وتتەكتى ورگاندارعا جانە تىندەرگە جەتكىزۋ جانە جاسۋشالىق تىنىسپەن قامتاماسىز ەتۋ. تەمىردىڭ جەتىسپەۋى اياقتى دىرىلدەتۋ ادەتىنىڭ پايدا بولۋىن ىنتالاندىرادى جانە انەميا شاقىرادى. ونىڭ سەبەبىنەن سوزىلمالى شارشاڭقىلىق، تابەتتىڭ جوعالۋى، دەمىكپە جانە كەۋدە تۇسىنىڭ اۋىرۋى پايدا بولۋى مۇمكىن.
كوفەيندى از ءىشىپ، الكوگولدەن باس تارتۋ
كوفە مەن الكوگول اعزاڭىزعا قالاي اسەر ەتەتىنىن ءبىلۋ ءۇشىن ولاردى ۋاقىتشا راتسيونىڭىزدان الىپ تاستاڭىز. ەگەر سودان كەيىن اياعىڭىزدى از دىرىلدەتەتىنىڭىزدى بايقاساڭىز، ول اعزاعا كوفەين مەن الكوگول مولشەرىن كوپ بەرگەنىڭىزدى بىلدىرەدى.
تىنىس الۋ گيمناستيكاسىمەن جانە يوگامەن اينالىسۋ
كەيدە فيزيكالىق جانە پسيحولوگيالىق كەرنەۋدى ءتۇسىرۋ ءۇشىن يوگامەن اينالىسۋ نەمەسە تىنىس الۋ گيمناستيكاسىنا ۋاقىت ءبولۋ جەتكىلىكتى. بۇل ارقىلى اعزانى وعان قاجەتتى وتتەكپەن قامتاماسىز ەتەسىز، يممۋنيتەتىڭىزدى كوتەرەسىز جانە قانتامىرلار جۇيەسى جۇمىسىن جاقسارتاسىز.
