پاۆلودار وبلىسىندا گوللانديالىق روبوتتار سيىر ساۋادى
استانا. قازاقپارات - استانادا اۋىل شارۋاشىلىعى تەحنيكاسىن شىعاراتىن گوللانديالىق Lely group كومپانياسى مەن قازاقستاندىق «ب ي ك» شارۋا قوجالىعى پاۆلودار وبلىسىندا اۆتوماتتاندىرىلعان ءسۇت فەرماسىن اشۋ جونىندە ىنتىماقتاستىق تۋرالى مەموراندۋمعا قول قويدى، دەپ حابارلايدى قازاقپارات ءتىلشىسى.
«ءبىز قازاقستاندا تولىقتاي روبوتتاندىرىلعان بىرنەشە فەرما سالۋدى جوسپارلاپ وتىرمىز. قازاقستاندى زەرتتەپ تە ۇلگەردىك. مۇندا ەكى سەرىكتەسىمىز بار، ءبىرى پاۆلوداردا، ەكىنشىسى اقتوبەدە. بۇل ەكى سەرىكتەستەرىمىزدىڭ تاۋارلارى بۇكىل ەل بويىنشا ساتىلۋدا»، - دەدى گوللانديالىق كومپانيانىڭ ت م د ەلدەرىندەگى وكىلى يەرۋن كايزەر قازاقستان- نيدەرلاند بيزنەس فورۋمى اياسىندا.
ونىڭ ايتۋىنشا، كومپانيا الەمدە ءبىرىنشى بولىپ سيىر ساۋاتىن جانە ولاردى ازىقتاندىراتىن روبوتتار شىعارۋدى قولعا العان.
ءبىر روبوت 60 سيىردى كۇنىنە ءۇش رەت ساۋا الادى.
زاۋىت جىل سايىن شامامەن 4 مىڭ روبوت شىعارادى، مۇنداي ءبىر قۇرىلعىنىڭ قۇنى فەرمەرلەر ءۇشىن شامامەن 150 مىڭ ەۋرونى قۇرايدى.
ول جاقىن ارادا كومپانيانىڭ رەسەيدەگى وكىلدىگى قازاقستانعا قونىس اۋدارۋدى جوسپارلاپ وتىرعانىن اتاپ ءوتتى.
«استانادا جەرگىلىكتى قىزمەتكەرلەر جۇمىس ىستەيتىن شاعىن كەڭسە مەن قويما اشۋدى جوسپارلاپ وتىرمىز»، - دەدى يەرۋن كايزەر.
